भारताच्या बदनामीसाठी इम्रान खान यांनी शेअर केले फेक व्हिडिओ

नवी दिल्ली: विविध मुद्द्यांवरून आंतरराष्ट्रीय स्तरावर नाचक्की झालेल्या पाकिस्ताननं आता रडीचा डाव खेळण्यास सुरुवात केली आहे. पाकिस्तानचे पंतप्रधान इम्रान खान यांनी भारताची बदनामी करण्यास सुरुवात केली आहे. भारताविरोधात ते खोट्या बातम्या पसरवत असल्याचं समोर आलं आहे. ननकाना साहिब गुरुद्वारावरील हल्ल्याच्या घटनेवरून लक्ष हटवण्यासाठी इम्रान खान यांनी शुक्रवारी रात्री काही व्हिडिओ ट्विट केले. भारतात मुस्लिमांवर पोलीस अत्याचार करत असल्याचा दावा त्यांनी केला. मात्र, त्यांचा हा खोटारडेपणा लगेच उघडकीस आला. इम्रान यांनी शेअर केलेले व्हिडिओ हे सात वर्षांपूर्वीचे असून, ते बांगलादेशातील असल्याचे उघड झाले आहे. खोटारडेपणा उघड होताच, त्यांनी ट्विट केलेले व्हिडिओ डिलिट केले.

इम्रान खान यांचा रडीचा डाव

पाकिस्तानमध्ये शुक्रवारी जमावानं ननकाना साहिब गुरुद्वारावर हल्ला चढवला. शीखांना हाकलून लावण्याची आणि शहराचं नाव बदलून गुलाम अली मुस्तफा करण्यात येणार असल्याच्या धमक्या देण्यात आल्या. दुसरीकडे पाकिस्तानचे पंतप्रधान इम्रान खान यांनी बांगलादेशातील व्हिडिओ हा उत्तर प्रदेशातील असल्याचं सांगून, ट्विटरवरून शेअर केला. तेथील पोलीस मुस्लिमांवर अत्याचार करत असल्याचा खोटा दावा केला.

पाकिस्तानमध्ये गुरुद्वारावर जमावाची दगडफेक





तो व्हिडिओ बांगलादेशचा...

भारतात नागरिकत्व कायद्याच्या विरोधात होत असलेल्या आंदोलनाच्या पार्श्वभूमीवर, इम्रान यांनी ट्विटरवर व्हिडिओ शेअर करून भारताची बदनामी करण्याचा प्रयत्न केल्याचं उघड झालं आहे. त्यांनी बांगलादेशचा व्हिडिओ शेअर केला आणि भारतीय पोलीस उत्तर प्रदेशात मुस्लिमांवर कशा प्रकारे अत्याचार करत आहेत, हे सांगण्याचा केविलवाणा प्रयत्न केला. मात्र, व्हिडिओमध्ये पोलिसांच्या गणवेशावर आरएबी असं स्पष्ट दिसत आहे. हा विभाग बांगलादेश पोलिसांचा आहे. जे व्हिडिओ ट्विट केले आहेत, ते व्हिडिओ यूट्यूबवर १० सप्टेंबर २०१३ रोजी अपलोड केलेले आहेत. व्हिडिओ बांगलादेशचा आहे.

उत्तर प्रदेश पोलिसांनी दिलं स्पष्टीकरण

उत्तर प्रदेश पोलिसांनीही ट्विट करून हा व्हिडिओ बांगलादेशचा असल्याचं सांगितलं. ही उत्तर प्रदेशातील घटना नसून, २०१३मध्ये बांगलादेशातील ढाका येथील घटना आहे, असं उत्तर प्रदेश पोलिसांनी स्पष्ट केलं.