पाकिस्तानी बहिणीने बांधली मोदींना राखी

दिल्ली: पंतप्रधान नरेंद्र मोदी यांची मानलेली बहीण कमर मोहसीन शेख यांनी रक्षाबंधनाच्या निमित्तानं आज दिल्लीत जाऊन मोदींना राखी बांधली. गेल्या २४ वर्षांपासून कमर मोहसीन मोदींना राखी बांधत आहेत.

मूळच्या पाकिस्तानातील कराचीच्या असलेल्या कमर मोहसीन यांनी अनेक वर्षांपूर्वी आपल्या कुटुंबासोबत अहमदाबादला स्थलांतर केलं आहे. नरेंद्र मोदी भाजपचे सामान्य कार्यकर्ते असल्यापासून कमर मोहसीन त्यांना राखी बांधतात. तसंच त्यांच्या दीर्घायुष्यासाठी प्रार्थना करतात. मोदी पंतप्रधान झाल्यानंतरही हा शिरस्ता कायम आहे. 'मला दरवर्षी बडे भाईंना राखी बांधण्याची संधी मिळते. मी खूप आनंदी आहे. त्यांची प्रकृती ठणठणीत राहो आणि पुढच्या पाच वर्षांत संपूर्ण विश्वात त्यांची ओळख निर्माण होवो,' अशी प्रार्थना देवाकडं केल्याचं कमर यांनी रक्षाबंधनानंतर मीडियाशी बोलताना सांगितलं.

कमर यांच्याप्रमाणेच देशातील अनेक सामाजिक संघटनांचे पदाधिकारीही रक्षाबंधनाच्या दिवशी मोदींना राखी बांधतात. व्यग्र दिनक्रमातून वेळ काढून मोदी रक्षाबंधनाचा सण साजरा करतात.