जयललितांची प्रतिमा समोर ठेवून बैठक

चेन्नईः तमिळनाडूच्या मुख्यमंत्री जे. जयललिता यांच्यावर अपोलो हॉस्पिटलमध्ये उपचार सुरू असल्याने त्यांच्या अनुपस्थितीत अर्थमंत्री ओ. पन्नीरसेल्वम यांनी मंत्रिमंडळाच्या बैठकीचे अध्यक्षस्थान स्वीकारले. मुख्यमंत्री जयललिता वगळता या बैठकीला ३२ मंत्री उपस्थित होते.

बुधवारी सकाळी ९.३० वाजता बैठक सुरू झाली. या वेळी अध्यक्षस्थानी असलेले पन्नीरसेल्वम यांनी त्यांच्यासमोर मुख्यमंत्री जयललिता यांची मोठी प्रतिमा ठेवली होती. ही बैठक सुमारे एक तास चालली. मुख्यमंत्री जयललिता हॉस्पिटलमध्ये असल्याने राज्यपाल सी. विद्यासागर राव यांनी मुख्यमंत्र्यांच्या खात्यांचा कार्यभार अर्थमंत्री पन्नीरसेल्वम यांच्याकडे सोपवला आहे. कावेरीच्या पाण्याच्या मुद्द्यावर बैठकीत प्रामुख्याने चर्चा झाली.