दिव्यांग क्रीडापटूला काढायला लावला कृत्रिम पाय

मटा ऑनलाइन वृत्त । बेंगळुरू

आशियाई पॅरा-सायकलिंग स्पर्धेत दोन रौप्यपदकं पटकावणारा दिव्यांग क्रीडापटू आदित्य मेहता याला बेंगळुरू एअरपोर्टवरील सुरक्षारक्षकांनी अत्यंत वाईट, आक्षेपार्ह वागणूक दिल्याचं समोर आलं आहे. सुरक्षेचं कारण देत त्याला सीआयएसएफच्या अधिकाऱ्यांनी कृत्रिम पाय काढायला लावलाच, पण कपडेही काढायला सांगून त्याची झडती घेतली. या प्रकाराबद्दल आदित्यने तीव्र संताप व्यक्त केला आहे.

आदित्य मेहताला मंगळवारी बेंगळुरूहून हैदराबादला जायचं होतं. पहाटे ५.३० वाजताचं विमान पकडण्यासाठी तो विमानतळावर पोहोचला होता. त्यावेळी तिथे जे घडलं ते अत्यंत दुर्दैवी आणि चीड आणणारंच होतं. 'सेंट्रल इंडस्ट्रीयल सिक्युरिटी फोर्स'च्या (सीआयएसएफ) अधिकाऱ्यांनी मला आधी कृत्रिम पाय काढायला लावला. तेवढ्यानं बहुतेक त्याचं समाधान झालं नाही. म्हणून त्यानं मला कपडेही काढायला सांगितले आणि माझ्याकडे पाहून सगळे हसायला लागले, असं आदित्य मेहतानं 'टाइम्स'ला सांगितलं. या प्रकाराची तक्रार जेव्हा त्यानं विमानतळ अधिकाऱ्यांकडे केली, तेव्हा ते हात वर करून मोकळे झाले. त्यामुळे संतापलेल्या आदित्यनं या प्रकरणातील अधिकाऱ्याचं नाव सोशल मीडियावर उघड केलं आहे.

दिव्यांग व्यक्तींच्या तपासणीसाठी फुल-बॉडी स्कॅनर्स बसवावेत, अशी विनंती नागरी उड्डाण विभागाला करूनही त्यावर काहीच कृती झाली नसल्याचं आदित्यनं स्पष्ट केलं. दिव्यांग व्यक्तींना एअरपोर्टवर कृत्रिम अवयव काढावेच लागतात, असं सांगत हैदराबादमधील डीजीसीए कार्यालयानं झाल्या प्रकाराचं समर्थनच केलं आहे.