Pariksha pe Charcha: मोदींच्या 'परीक्षा पे चर्चा'मध्येही पबजींचा बोलबाला

नवी दिल्ली: पंतप्रधान नरेंद्र मोदी यांनी आज शालेय विद्यार्थी आणि पालकांसोबत 'परीक्षा पे चर्चा' केली. यावेळी त्यांनी अनेक प्रश्नांची उत्तरे दिली. या दरम्यान एका आईने ऑनलाइन गेमिंगमुळे मुलांचे अभ्यासाकडे दुर्लक्ष होत असल्याचे सांगितले. त्यावेळी पंतप्रधान मोदी यांनी पब्जीचा उल्लेख करताच सगळं तालकटोरा स्टेडियम हास्यकल्लोळात बुडाले. 'परीक्षा पे चर्चा' कार्यक्रमात पंतप्रधान नरेंद्र मोदी विद्यार्थ्यांसह पालकांशीही संवाद साधला. यावेळी एका मुलाच्या आईने ऑनलाइन गेमिंगचा प्रश्न विचारला. ऑनलाइन गेमिंगमुळे मुलांचा अभ्यासाकडे दुर्लक्ष होते, यावर काय करावे असा प्रश्न विचारला. त्याला उत्तर देताना पंतप्रधान नरेंद्र मोदी यांनी हे पब्जीवाला का? असा प्रश्न विचारला. त्यावेळी उपस्थितांमध्ये हशा निर्माण झाला. पुढे बोलताना पंतप्रधान नरेंद्र मोदी यांनी सागितले की, आपण मुलांना तंत्रज्ञानापासून दूर नेता कामा नये. त्यांना योग्यप्रकारे तंत्रज्ञानाबाबत प्रोत्साहीत करायला हवे. मुलांना तंत्रज्ञान कसे वापरावे यासाठी मार्गदर्शन करायला हवे. पालकांनी मुलांसोबत चर्चादेखील करायला हवी. तंत्रज्ञानामुळे मुले रोबोट तर बनत नाहीत ना, याकडे पालकांनी लक्ष द्यायला हवे असे पंतप्रधान नरेंद्र मोदी यांनी नमूद केले.