'आत्महत्येचा प्रयत्न आता गुन्हा ठरणार नाही'

मटा ऑनलाइन वृत्त । नवी दिल्ली

'मेंटल हेल्थ केअर २०१६' या विधेयकाला सोमवारी लोकसभेत मंजुरी मिळाल्याने आत्महत्येचा प्रयत्न करणे हा आता गुन्हा ठरणार नाही. गेल्यावर्षी ऑगस्टमध्ये हे विधेयक राज्यसभेत मंजूर करण्यात आले होते. नव्या कायद्यानुसार, आत्महत्येचा प्रयत्न करण्याला मानसिक रोगी या श्रेणीत ठेवण्यात आले आहे. ज्या व्यक्तीने आत्महत्येचा प्रयत्न केला त्या व्यक्तीविरुद्ध गुन्हा नोंदवण्याऐवजी त्याच्यावर उपचार करण्यात येईल.

पंतप्रधान नरेंद्र मोदी यांनी नुकतेच 'मन की बात' या कार्यक्रमात मानसिक ताण-तणाव यावर चर्चा केली होती. आत्महत्येचा प्रयत्न करणाऱ्याविरुद्ध १९८७ कायद्यांतर्गत गुन्हा नोंदवला जात होता, अशी माहिती केंद्रीय आरोग्यमंत्री जे. पी. नड्डा यांनी दिली. मानसिक रोगी असलेल्या व्यक्तीला त्याच्या मुलांपासून तीन वर्षांपर्यंत वेगळे ठेवले जाऊ शकत नाही. या कायद्याचा उद्देश म्हणजे मानसिक रोगीला सुरक्षा आणि उपचार देणे हे होय, असे नड्डा म्हणाले.

भाजप आमदार अश्विनी कुमार यांनी नव्या कायद्यात संगीत थेरेपीचा समावेश करण्याचा सल्ला दिला. नव्या कायद्यांतर्गत मानसिक रोगाने ग्रस्त असलेल्या व्यक्तीला उपचार कसा आणि कुठं करायचा हा अधिकार असायला हवा. मानसिक रोगाने ग्रस्त असलेल्या व्यक्तीला सहानुभूती आणि सहकार्याची गरज असते. त्यामुळेच हा नवीन कायदा निर्माण करण्यात आला आहे.