पर्रीकर यांची गोवा 'वापसी' होणार?

मटा ऑनलाइन वृत्त । नवी दिल्ली

गोव्यात भाजपविरोधात महाराष्ट्रवादी गोमंतक पक्ष, गोवा सुरक्षा मंच आणि शिवसेनेने केलेली महाआघाडी, आम आदमी पक्षाने दिलेली धडक आणि काँग्रेसने आपल्या चार माजी मुख्यमंत्र्यांना निवडणुकीच्या आखाड्यात उतरून दिलेले आव्हान यांमुळे भाजपसाठी गोव्याचा सोप्पा पेपर अवघड झाला आहे. या स्थितीत गोव्यातील सत्ता राखण्यासाठी भाजपकडून 'मिस्टर क्लीन' मनोहर पर्रीकर यांचा चेहरा पुढे केला जात असून ते पुन्हा गोव्याचे मुख्यमंत्रीही होऊ शकतात, असे संकेत भाजप नेतृत्वाकडून मिळू लागले आहेत.

पर्रीकर दिल्लीत आल्यानंतर त्यांच्या जागी वर्णी लागलेले मुख्यमंत्री लक्ष्मीकांत पार्सेकर हे आपला फारसा प्रभाव पाडू शकलेले नाहीत. त्यामुळे त्यांच्या नेतृत्वावर विसंबून राहिल्यास पक्षाला गोव्याची सत्ता हातून गमवावी लागू शकते, अशी भीती भाजप नेतृत्वाला असून त्यातूनच पर्रीकर यांना गोव्यात तळ ठोकण्यास सांगण्यात आल्याचे कळते.

गोव्यातील भाजप उमेदवारांची पहिली यादी गुरुवारी दिल्लीत जाहीर करण्यात आली. यावेळी पर्रीकर यांच्या गोवा 'वापसी'वर गोव्याचे प्रभारी नितीन गडकरी यांनी सूचक वक्तव्य केलं. निवडून आलेल्या आमदारांनी कौल दिला तर दिल्लीतील एखादा नेता गोव्याचा मुख्यमंत्री होऊ शकतो, असे गडकरी म्हणाले. पत्रकारांनी थेट पर्रीकर यांचे नाव घेतले असता पक्षात अनेक नेते आहेत. आमच्याकडे नेत्यांची कमी नाही. पक्षाकडे सर्व पर्याय खुले आहेत, असे गडकरी म्हणाले. गोव्यात निवडून येणारे नवे आमदार त्यांचा नेता निवडतील. तो नेता त्यांच्यातील असावा असा काही दंडक नाही, असेही गडकरी यांनी नमूद केले. आमदारांची इच्छा असेल तर लक्ष्मीकांत पार्सेकर हेच पुन्हा गोव्याचे मुख्यमंत्री होऊ शकतात, असेही त्यांनी पुढे नमूद केले.

दरम्यान, मनोहर पर्रीकर, श्रीपाद नाईक, लक्ष्मीकांत पार्सेकर आणि भाजपचे गोवा प्रदेशाध्यक्ष विनय तेंडुलकर यांच्या नेतृत्वाखाली गोव्यात भाजप निवडणुका लढत आहे. यात पर्रीकर यांचा अनुभव आणि लोकप्रियता या जमेच्या बाजू लक्षात घेऊन त्यांना पुन्हा गोव्याची जबाबदारी दिली जाऊ शकते. याबाबत पंतप्रधान नरेंद्र मोदी आणि भाजप अध्यक्ष अमित शहा यांच्यात चर्चाही झाली आहे, असे सूत्रांनी सांगितले.