‘गोव्यातील सरकार पर्रीकरांच्या नेतृत्वाखाली’

पणजी : संरक्षणमंत्री मनोहर पर्रीकर यांना गोव्यात परत पाठवावे, अशी राज्यातील नागरिकांची मागणी आहे. परंतु पंतप्रधान नरेंद्र मोदी यांना केंद्रातही त्यांची गरज आहे. त्यामुळे विधानसभा निवडणुकीनंतरच त्यांनी कुठे काम करायचे याबाबत निर्णय घेतला जाईल. परंतु ते कुठेही असले तरी गोव्यातील सरकार त्यांच्या नेतृत्वाखालीच काम करेल याची मी आपणास ग्वाही देतो, असे प्रतिपादन भाजपचे राष्ट्रीय अध्यक्ष अमित शहा यांनी सोमवारी केले.

तत्पूर्वी, केंद्रीय मंत्री आणि गोव्याचे निवडणूक प्रमुख नितीन गडकरी यांनी निवडून आलेले लोकप्रतिनिधी राज्याचा मुख्यमंत्री निवडतील किंवा थेट केंद्रातून यासाठी उमेदवार पाठवण्यात येईल, असे वक्तव्य केले होते. त्यामुळे गोव्याची सूत्रे कुणाच्या हाती असतील याबाबत तर्कवितर्क लढवले जात होते.