'ही' ट्रेन उशिरा आली तर मिळणार नुकसानभरपाई

नवी दिल्ली:
जर तुम्ही देशातल्या पहिल्या 'खासगी' ट्रेनने प्रवास करणार असाल आणि प्रवासात विलंब झाला तर तुम्हाला त्याची नुकसानभरपाई मिळणार आहे. तेजसचा प्रवास एका तासाहून अधिक लांबला तर तुम्हाला नुकसानभरपाई मिळणार आहे.

आयआरसीटीसी ऑक्टोबर महिन्यापासून ही तेजस ट्रेन सुरू होणार आहे. पहिली ट्रेन दिल्ली ते लखनऊ दरम्यान धावणार आहे. या ट्रेनचं भाडं याच मार्गावरून धावणाऱ्या शताब्दी एक्स्प्रेसएवढंच असेल, पण यात अनेक सुविधा देण्यात आल्या आहेत. दुसरी तेजस नोव्हेंबरमध्ये सुरू होणार आहे. ती मुंबई ते अहमदाबाद मार्गावर धावेल.

ट्रेनकडून विमानप्रवासाकडे वळणाऱ्या प्रवाशांना पुन्हा ट्रेनशी जोडण्यासाठी आयआरसीटीसी तेजस ट्रेनमध्ये जास्त सोयीसुविधा देत आहे. आयआरसीसीटीच्या एका अधिकाऱ्याने सांगितलं, 'रेल्वे नाश्ता देते, पण लखनऊ येता येता लोकांना भूक लागू लागते. म्हणून आम्ही नाश्ता देण्याचा विचार करतोय, जेणेकरून प्रवासी उपाशी राहणार नाहीत आणि जेवणाच्या वेळी ते लखनऊला पोहोचतील तेव्हा त्यांना खूप जास्त भूक लागलेली नसेल.'

कंपनी ज्येष्ठ नागरिकांसाठीही भाड्यात सवलत वगैरै विशेष सोयी देण्याच्या विचारात आहे. तिकीटासोबत ५० लाख रुपयांचं इन्श्युरन्स कव्हर देण्याचा देखील विचार होत आहे. तुम्ही प्रवासात असताना घरी चोरी झाली तर या विम्याचा लाभ मिळणार आहे. आयआरसीटीसी या नव्या प्रयोगाच्या परिणामांची वाट पाहात आहे, जेणेकरून अन्य मार्गांवरही तेजस ट्रेन सुरू करता येईल.