दिशाभूल करणारी जाहिरात; पतंजलीला ११ लाखांचा दंड

मटा ऑनलाइन वृत्त । हरिद्वार

योगगुरू रामदेव बाबांची कंपनी पतंजली आयुर्वेद लिमिटेडला चुकीच्या, गैरसमज पसरवणाऱ्या जाहिरातींबद्दल ११ लाख रुपयांचा दंड ठोठावण्यात आला आहे. दुसऱ्याचे उत्पादन स्वत:च्या नावावर खपवल्याचा पतंजलीवर आरोप आहे. 'मिसब्रॅंडिंग'च्या एकूण पाच प्रकारात पतंजली दोषी ठरल्याने हरिद्वारच्या न्यायालयाने कंपनीच्या पाच उत्पादनांना हा दंड लावला आहे. पतंजलीची वर्षाची उलाढाल ५ हजार कोटी रुपये आहे आणि पुढील आर्थिक वर्षापर्यंत ती १० हजार कोटी करण्यासाठी कंपनी पावले उचलत आहे.

अन्न सुरक्षा आणि मानके कायदा, २००६ च्या कलम ५२ (ब्रॅंडिंगबाबत दिशाभूल), कलम ५३ (दिशाभूल करणारी जाहिरात) आणि अन्न सुरक्षा आणि दर्जा (पॅकेजिंग आणि लेबलिंग नियंत्रण कायदा, २०११) कायद्याच्या २३.१(५) या कलमांखाली पतंजलीला हा दंड ठोठावण्यात आला असून तो एक महिन्याच्या आत भरायचा आहे. भविष्यात या उत्पादनांच्या बाबतीत सुधारणा झाली नाही तर योग्य ती कारवाई करण्याचे आदेशही न्यायालयाने अन्नसुरक्षा विभागाला दिले आहेत.

१६ ऑगस्ट २०१२ रोजी कंपनीचे मध, मीठ, तीळाचे तेल, जॅम, बेसन या उत्पादनांचे नमुने तपासणीसाठी पाठवले असता सदोष आढळले होते. ही केस हरिद्वारच्या अतिरिक्त जिल्हा दंडाधिकाऱ्यांच्या न्यायालयात नोव्हेंबर २०१२ मध्ये दाखल झाली होती. नमुन्यांची तपासणी उत्तराखंडच्या रुद्रपुर येथील FSSAI प्रमाणित अन्न आणि औषध चाचणी प्रयोगशाळेत झाली होती.