यूपीः पतंजलीचा फूड पार्क हलवणार नाही

लखनऊ

उत्तर प्रदेशातील ग्रेटर नोएडामधील मेगा फूड पार्क अन्य ठिकाणी हलवण्यात येणार असं आचार्य बालकृष्ण यांनी ट्विट केल्यानंतर उत्तर प्रदेश सरकार खडबडून जागं झालं. मुख्यमंत्री योगी आदित्यनाथ यांनी तातडीनं योगगुरू बाबा रामदेव यांच्याशी चर्चा केली. योगी आदित्यनाथ आणि बाबा रामदेव या दोघांत झालेल्या चर्चेमुळे फूड पार्क उत्तर प्रदेशातून हलवण्यात येणार नसल्याचं सूत्रांनी सांगितलं आहे.

ग्रेटर नोएडामधील प्रस्तावित मेगा फूड पार्क अन्य ठिकाणी हलवण्याचा निर्णय पतंजलीनं घेतला आहे असं ट्विट काल पतंजली आयुर्वेद लिमिटेडचे व्यवस्थापकीय संचालक आणि पतंजली योगपीठाचे सहसंस्थापक आचार्य बालकृष्ण यांनी ट्विट केलं होतं. श्रीराम व कृष्ण यांच्या पवित्र भूमीत शेतकऱ्यांच्या जीवनात समृद्धी आणण्याचा संकल्प राज्य सरकारच्या उदासीसनतेमुळे अपूर्णच राहणार आहे, असंही आचार्य बालकृष्ण यांनी ट्विटमध्ये म्हटलं होतं. आचार्य बालकृष्ण यांच्या ट्विटनंतर उत्तर प्रदेश सरकारला जाग आली असून मुख्यमंत्री योगी आदित्यनाथ यांनी बाबा रामदेव यांच्याशी याविषयावर चर्चा केली.



मुख्यमंत्री योगी आदित्यनाथ यांच्या आदेशानंतर मुख्य सचिवांनी यासंदर्भात एक बैठक बोलावली असून या बैठकीत सरकारच्या नियमांत संशोधन करण्याचा निर्णय घेण्यात आल्याची माहिती सूत्रांनी दिली. मुख्यमंत्री योगी आदित्यनाथ यांनी घेतलेल्या निर्णयावर आमचा विश्वास आहे, अशी माहिती पतंजलीचे प्रवक्ते एसके तिजरावाला यांनी दिली.