घरात मोर पाळले; लालूप्रसाद यादव अडचणीत

मटा ऑनलाइन वृत्त । पाटना

घरात मोर पाळणं कायद्याने गुन्हा असतानाही राष्ट्रीय जनता दलाचे प्रमुख लालूप्रसाद यादव यांनी घरात एक नव्हे तर तब्बल १० मोर पाळले आहेत. त्यामुळे ते अडचणीत सापडण्याची शक्यता असून बेकायदेशीरपणे मोर पाळल्याबद्दल त्यांना सात वर्षाचा कारावास किंवा २५ हजार रुपयांचा दंड ठोठावला जाऊ शकतो असं सूत्रांनी सांगितलं.

पटना येथे सर्कुलर रोडवर लालूप्रसाद यादव यांचं सरकारी निवासस्थान आहे. या ठिकाणी त्यांनी एक मोर आणि मोरणी आणली होती. त्यामुळे वाद झाला होता. तेव्हा या मोर आणि मोरणीला आपण काही महिन्यापूर्वीच सोडून दिलं होतं, पण ते परत आले, असं लालूंनी तेव्हा स्पष्ट केलं होतं. मात्र आता लालूंच्या घरात दहा मोर आढळल्याने लालू अडचणीत आले आहेत.

'लालूंनी बेकायदेशीरपणे मोरांची जोडी आणली असेल तर ते अडचणीत सापडू शकतात. मोरांची तस्करी करणं कायद्यानं गुन्हा आहे,' असं भारतीय पक्षी संरक्षण नेटवर्कचे राज्य संयोजक अरविंद मिश्रा यांनी सांगितलं. दरम्यान, मोर हा राष्ट्रीय पक्षी असल्याने वन्यजीव संरक्षण कायदा-१९७२ अंतर्गत शेड्यूल-१ नुसार मोर पाळणं गुन्हा ठरवण्यात आला आहे. या कायद्यानुसार कुणाकडेही मोर आढळल्यास कारवाई करता येते. या कायद्यानुसार सात वर्षाची शिक्षा किंवा २५ हजार रुपये दंड किंवा दोन्ही शिक्षा ठोठावण्याची तरतूद आहे.