पहलू खान हत्या: सहा आरोपींना क्लीन चिट

मटा ऑनलाइन वृत्त । जयपूर

राजस्थानतील अल्वर येथील दूध डेअरी चालक पहलू खान यांच्या हत्या प्रकरणातील सहा आरोपींना पोलिसांनी क्लीन चिट दिली आहे. गो-शाळेतील कर्मचाऱ्यांची साक्ष व मोबाइल फोनमधील रेकॉर्डिंगच्या आधारे पोलिसांनी हा निर्णय घेतला आहे.

१ एप्रिल रोजी अल्वर येथून हरयाणात जनावरं घेऊन जात असताना गो तस्करीचा आरोप करत एका टोळक्यानं पहलू खान यांच्यावर हल्ला केला होता. त्यात जबर जखमी झालेल्या पहलू खान यांचा रुग्णालयात मृत्यू झाला. तत्पूर्वी, त्यांनी पोलिसांना दिलेल्या जबानीत सहाजणांची नावं सांगितली होती. या आरोपींची माहिती देणाऱ्यास पोलिसांनी इनाम जाहीर केले होते. त्यानंतर त्यांना ताब्यातही घेण्यात आले. मात्र, चौकशीअंती या सर्वांची निर्दोष सुटका करण्यात आली आहे.

राजस्थान पोलिसांच्या गुन्हे शाखेनं याबाबतचा अहवाल दिला आहे. पहलू खानवर हल्ला झाला तेव्हा संबंधित संशयित आरोपी गो शाळेत होते, असं पोलिसांच्या चौकशी अहवालात नमूद करण्यात आलं आहे. सहाही आरोपी निर्दोष ठरल्यानं त्यांच्यावर जाहीर केलेलं इनाम मागं घेण्यात आलं आहे, असं अल्वरचे पोलीस उपअधीक्षक राहुल प्रकाश यांनी सांगितलं.

काँग्रेसची सीबीआई चौकशीची मागणी

पहलू खानच्या मारेकऱ्यांना सोडण्याच्या पोलिसांच्या निर्णयावर काँग्रेसनं टीका केली आहे. 'सत्ताधाऱ्यांच्या दबावामुळं आरोपींना सोडलं गेलं आहे. हे आरोपी हिंदुत्ववादी संघटनांशी संबंधित असून या प्रकरणाची सीबीआय चौकशी व्हावी, अशी मागणी काँग्रेसनं केली आहे.

हा विश्वासघात!

'हा विश्वासघात आहे. आम्ही स्वत: आरोपींची नावं आमच्या कानांनी ऐकली आहेत. आम्ही पुन्हा चौकशीची मागणी करू,' असं पहलू खान यांचा मुलगा इर्शादनं सांगितलं. पहलू खान यांच्यावर हल्ला झाला तेव्हा इर्शाद त्यांच्यासोबतच होता.