पेट्रोलपंप चालकांचा देशव्यापी संप मागे

मटा ऑनलाइन वृत्त । नवी दिल्ली

पेट्रोल आणि डिझेलचे दर दररोज बदलण्याच्या केंद्र सरकारच्या निर्णयाविरोधात देशातील पेट्रोलपंप चालकांनी १६ जूनपासून पुकारलेला संप मागे घेतला आहे. पेट्रोलपंप चालकांनी देशव्यापी संप मागे घेण्याचा निर्णय घेतला असला तरी केंद्रीय पेट्रोलियम मंत्री धर्मेंद्र प्रधान यांनी मात्र १६ जूनपासून दररोज पेट्रोल आणि डिझेलचे दर बदलणार असल्याचा पुन्हा एकदा पुनरूच्चार केला आहे.

भारतातही १६ जूनपासून आंतरराष्ट्रीय दरांशी सुसंसगतता राखून देशभरातील पेट्रोल व डिझेलचे दर दररोज निश्चित करण्यात येणार आहे. देशातील पाच शहरांमध्ये प्रायोगिक तत्त्वावर ही योजना राबवल्यानंतर १६ जूनपासून सरकारी तेल कंपन्या देशभरातील सर्व म्हणजे ५८ हजार पेट्रोल पंपावरील पेट्रोल व डिझेलच्या दररोज आढावा घेणार आहेत.

इंडियन ऑइल, हिंदुस्तान पेट्रोलियम आणि भारत पेट्रोलियम कंपन्यांनी मार्जिनल डिफरन्शिअल प्राइसिंगचे धोरण राबवण्याचे ठरवले. पेट्रोल पंपांगणिक हे दर बदलण्याचा निर्णयही घेण्यात आला. मात्र या निर्णयाला पेट्रोल वितरकांनी जोरदार विरोध दर्शवला होता. काही पेट्रोलपंप चालकांना या निर्णयाचा फायदा होणार असला तरी बहुसंख्य पेट्रोलपंपचालकांना त्याचा तोटाच होणार असल्याचं सांगत या निर्णयाविरोधात १६ जूनपासून संपावर जाण्याचा इशारा त्यांनी दिला होता. ऑइल कंपन्यांकडून पेट्रोल विकत न घेण्याचा निर्णय वितरकांनी घेतला होता. मात्र आज पेट्रोल वितरकांनी संप मागे घेण्याचा निर्णय घेतल्याने ग्राहकांना दिलासा मिळाला आहे.