remdesivir : रेमडेसिवीरची किंमत कमी झाली, तरीही तज्ज्ञांकडून चिंता व्यक्त

नवी दिल्लीः करोना रुग्णांच्या वाढत्या संख्येमुळे तुटवडा जाणवत असलेल्या रेमडेसिवीर इंजेक्शनची ( remdesivir ) किंमत उत्पादक औषध कंपन्यांनी लक्षणीयरित्या कमी केल्या आहेत. यामुळे करोना संसर्गा सामना करत असलेल्या रुग्णांना दिलासा मिळाला आहे. केंद्र सरकार हस्तक्षेप केल्यानंतर औषध निर्मात्या कंपन्यांनी हा निर्णय घेतला आहे.

रेमडेसिवीरची १०० एमएल व्हायलवर ८९९ ते ३४९० रुपयांपर्यंत किंमत कमी झाली आहे. वेगवेगळ्या कंपन्यांची रेमडेसिवीरची किंमत हे २८०० ते ५४०० रुपयांपर्यंत होती. देशातील करोनाची स्थिती बिकट होत चालल्याने रेमडेसिवीर बनवणाऱ्या ७ उत्पादक औषध कंपन्यांनी स्वतःहून किंमत कमी करण्याचा निर्णय घेतला आहे.

देशात जवळपास दीड महिन्यापासून करोना रुग्णांची संख्या अतिशय वेगाने वाढत आहे. यामुळे दिवसेंदिवस करोनाने स्थिती अधिक बिकट होत चालली आहे. रुग्ण संख्या वाढल्याने रेमडेसिवीर इंजेक्शनची मागणी वाढली आहे. यामुळे करोनावरील उपचारात उपयोगी असलेल्या रेमडेसिवीर इंजेक्शनचा तुटवडा अनेक राज्यांमध्ये जाणवत आहे. यासोबतच काही राज्यांमध्ये बेड आणि ऑक्सिजनच्या तुटवड्याचा सामना करावा लागतोय. ऑक्सिजन अभावी रुग्णांचे मृत्युही होत आहेत.

रेमडेसिवीरच्या तुटवड्याच्या पार्श्वभूमीवर केंद्र सरकारने त्याच्या निर्यातीवर बंदी घातली आहे. देशातील गरज लक्षात घेता केंद्र सरकारने हा निर्णय घेतला आहे. तसंच केंद्र सरकारने संबंधित कंपन्यांना रेमडेसिवीरचे उत्पादन वाढवण्याच्या सूचना दिल्या आहेत. यामुळे कंपन्यांनी रेमडेसिवीरचे उत्पादन दुप्पट करण्याचा निर्णय घेतला आहे. सरकारने कंपन्यांशी चर्चा केल्यानंतर रेमडेसिवीर उत्पादक कंपन्यांनी स्वतःहून त्याच्या किंमती घटवल्या आहेत.

coronavirus india update : करोनाची दुसरी लाट जीवघेणी; २४ तासांत अडीच लाखाहून अधिक नवीन रुग्ण, १५०० मृत्यू

रेमडेसिवीर कंपन्यांनी किमती कमी केल्या असल्यातरी वेगवेगळ्या कंपन्यांच्या किमतीत मोठी तफावत आहे. यावरून सार्वजनिक आरोग्यबाबत तज्ज्ञांनी चिंता व्यक्त केली आहे. अशा आपत्कालीन स्थितीत सरकारने सर्व कंपन्यांच्या रेमडेसिवीर इंजेक्शनच्या किमतीवर नियंत्रण आणावं, अशी मागणी त्यांनी केली आहे. रेमडेसिवीरचे उत्पानद करणाऱ्यांमध्ये कॅडिला हेल्थ केअर, सिपला, डॉ. रेड्डीज लॅबोरेटरीज, हेटेरो लॅब्स, ज्युबिलियंट फार्मा, मायलन आणि सेंजन इंटरनॅशनल आणि स्थानिक उत्पादकांचा यात समावेश आहे. या कॅडिलाच्या रेमडेसिवीरची किंमती सर्वात कमी आहे. ८९९ रुपयांना एक व्हायर मिळते आहे.