आता प्लास्टिकच्या तांदळाची दहशत

मटा ऑनलाइन वृत्त । हैदराबाद/विशाखापट्टणम

प्लास्टिकच्या अंड्यांनंतर आता बाजारात प्लास्टिकचे तांदूळ विकले जात असल्याची अफवा वेगाने पसरत असून आंध्र प्रदेश, तेलंगण आणि उत्तराखंडमधील नागरिकांमध्ये भीतीचे वातावरण आहे.

दोन दिवसांपूर्वी हैदराबादमधील सरूनगर येथे एका ग्राहकाने 'बिर्याणी पॉइंट' येथे प्लास्टिकचे तांदूळ वापरण्यात आल्याचा दावा केला होता. तर मंगळवारी तेलंगणमधील मीरपेट येथे एका इसमाने किराण दुकानात प्लास्टिकचे तांदूळ मिळत असल्याची तक्रार पोलिसांत नोंदवली. उत्तराखंडमध्येही काही मुलं प्लास्टिकच्या तांदळाचा बॉल बनवून खेळत असल्याचा व्हिडीओ व्हायरल झाला होता. या प्रकरणाची माहिती मिळताच नागरी पुरवठा विभागातील अधिकाऱ्यांनी मीरपेटमधील दुकानावर छापा मारत तांदळाचे नमुने जप्त केले असून ते प्रयोगशाळेत तपासणीसाठी पाठवण्यात येणार आहेत.

आंध्र प्रदेशमध्येही मोठ्या प्रमाणावर प्लास्टिकचे तांदूळ विकण्यात येत असल्याची अफवा पसरली असून स्थानिक नागरिकांमध्ये अस्वस्थता पसरली आहे. 'नंदनवनम येथील रहिवासी अशोक यांनी याप्रकरणी तक्रार दाखल केली होती. गेल्या काही दिवसांपासून त्यांना व कुटुंबियांना पोटात दुखणे, हात-पाय दुखणे, असे अनेक त्रास सुरू होते. सोमवारी रात्री ते जेवायला बसले असता, शिजवलेला भात खाण्यालायक नसल्याचे त्यांच्या लक्षात आले' असे त्यांनी तक्रारीत नमूद केल्याचे मीरपेट पोलिसांनी सांगितले. आंध्रप्रदेशमध्येही फेसबूक, व्हॉट्सअॅप व इतर सोशल मीडियावरून प्लास्टिकच्या तांदळाच्या अफवा व्हायरल होत आहेत. याप्रकरणी अद्याप कोणतीही अधिकृत माहिती मिळाली नसली तरी अफवांमुळे लोकांमधील अस्वस्थता वाढताना दिसत आहे. दरम्यान, राज्यातील व्यापाऱ्यांनी मात्र हे वृत्त साफ फेटाळून लावले असून शहरात कुठेही प्लास्टिकचे तांदूळ विकले जात नसल्याचे स्पष्ट केले.

उत्तराखंडमधील व्हिडिओही व्हायरल

उत्तराखंडमधील हलद्वानी येथेही प्लास्टिकचे तांदूळ विकले जात असल्याची माहिती आहे. तेथील स्थानिक रहिवासी पाल यांनी एका दुकानातून तांदूळ विकत घेतले मात्र त्याची चव चांगली नव्हती. त्यांच्या घरातील मुलांनी त्या तांदळाचा चेंडू बनवून खेळायला सुरूवात केली आणि तो व्हिडीओ व्हायरल झाल्यामुळे प्लास्टिकच्या तांदळाची पुन्हा चर्चा सुरू झाली.