सोनिया गांधींविरोधात FIR दाखल, काँग्रेसने दिली संतप्त प्रतिक्रिया

नवी दिल्लीः काँग्रेसच्या हंगामी अध्यक्ष सोनिया गांधी यांच्याविरोधात कर्नाटकमध्ये एफआयआर दाखल करण्यात आली आहे. काँग्रेसने याचा निषेध केलाय. हे सूडाचे राजकारण असून कर्नाटक सरकारला याची लाज वाटली पाहिजे, अशी प्रतिक्रिया काँग्रेसने दिलीय. हे केवळ दुर्दैवी नाही तर निषेधार्ह आहे. पक्षाच्या ट्विटर हँडलवरून पीएम केअर्सच्या मुद्द्यावर प्रश्न उपस्थित करण्यात आला होता. पण राजकीय सूडातून सत्ताधाऱ्यांनी सर्व सीमा ओलांडल्या आहेत. कर्नाटक सरकारला याची लाज वाटायला हवी, अशी संतप्त प्रतिक्रिया काँग्रेस प्रवक्त्या सुप्रिया श्रीनेत यांनी दिलीय.

आपण एक लोकशाही देश आहोत. लोकशाहीत विरोधी पक्षांना प्रश्न उपस्थित करण्याचा अधिकार आहे. पीएम केअर्स फंडमध्ये पैसे जमा झाले आहेत तर ते स्थलांतरीत मजुरांसाठी का वापरले जात नाहीए? हा आमचा सवाल आहे आणि आम्ही त्यावर ठाम आहोत, असं सुप्रिया श्रीनेत म्हणाल्या.

कर्नाटकच्या मुख्यमंत्र्यांना काँग्रेस प्रदेशाध्यक्षांचे पत्र

दरम्यान, कर्नाटकमधील काँग्रेसचे प्रदेशाध्यक्ष डी.के. शिवकुमार यांनी मुख्यमंत्री येडीयुरप्पा यांना पत्र लिहिलंय. काँग्रेस अध्यक्ष सोनिया गांधींविरोधात दाखल करण्यात आलेली एफआयआर मागे घ्यावी, अशी मागणी शिवकुमार यांनी पत्रातून केली आहे. एफआयआर मागे घ्यावी आणि अधिकाराचा दुरुपयोग करून ती दाखल करून घेणाऱ्या पोलीस अधिकाऱ्याला तात्काळ निलंबित करावं, असं शिवकुमार यांनी पत्रात म्हटलंय.

कर्नाटकातील शिवमोगा जिल्ह्यातील सागर येथील पोलीस ठाण्यात सोनिया गांधीविरोधात बुधवारी एफआयआर दाखल करण्यात आलीय. प्रवीण नावाच्या एका व्यक्तीने या संदर्भात पोलीस तक्रार केलीय. पीएम केअर्स फंडाबाबत निराधा आरोप करून जनतेत संभ्रम निर्माण करण्याचा प्रयत्न केल्याचा आरोप तक्रारीत करण्यात आला आहे. काँग्रेस अध्यक्ष सोनिया गांधींविरोधात आयपीसीच्या कलम १५३, ५०५ अंतर्गत हा एफआयआर दाखल झाली आहे.