आता चर्चा फक्त भारतीय लष्कराची!: मोदी

मटा ऑनलाइन वृत्त । मंडी (हिमाचल प्रदेश)

'आतापर्यंत आम्ही इस्रायली लष्कराच्या पराक्रमाच्या गाथा ऐकत आलो, पण आता भारतीय लष्कराची चर्चा सुरू झाली आहे. भारतीय लष्कर कुणापेक्षाही कमी नाही हे आम्ही दाखवून दिलंय,' असं दणदणीत प्रतिपादन पंतप्रधान नरेंद्र मोदी यांनी आज केलं.

हिमाचल प्रदेश येथील मंडीमध्ये तीन ऊर्जा प्रकल्पांच्या उद्घाटनानंतर झालेल्या सभेत मोदी बोलत होते. भारतीय सैन्यात हिमाचल प्रदेशातील जवानांची मोठी संख्या आहे. त्यामुळं आपल्या भाषणात मोदी यांनी 'सर्जिकल स्ट्राइक'च्या यशाचा व 'वन रँक वन पेन्शन'च्या आश्वासनपूर्तीचा आवर्जून उल्लेख केला. मोदी यांनी भारतीय लष्कराची तुलना इस्रायलच्या लष्कराशी केली. 'भारतीय लष्कर हे जगभरात वाखाणल्या जाणाऱ्या इस्रायली लष्कराच्या तोडीचं आहे. पूर्वी जे इस्रायलचे गुण गायचे, ते आता भारतीय लष्कराच्या पराक्रमाच्या गाथा गाऊ लागले आहेत,' असं मोदी म्हणाले.

निवृत्त सैनिकांसाठीची 'वन रँक वन पेन्शन' योजना गेल्या ४० वर्षांपासून रखडली होती. आमच्या सरकारनं काही दिवसांतच हा प्रश्न मार्गी लावला. त्यासाठी तब्बल ५,५०० कोटी रुपयांची तरतूद केली आणि उर्वरित आर्थिक तरतूदही लवकरच केली जाईल,' असं मोदी यांनी यावेळी स्पष्ट केलं.

आधीच्या काँग्रेसप्रणित यूपीए सरकारवर मोदी यांनी यावेळी हल्ला चढवला. 'आमची सत्ता आली तेव्हा देशातील अनेक प्रकल्प रखडल्याचं आमच्या निदर्शनास आलं. या प्रकल्पांच्या निव्वळ घोषणा झाल्या, पण पुढं काहीच झालं नव्हतं. त्यामुळं या प्रकल्पांच्या फायली शोधण्यासाठी आम्हाला एक नवा पुरातत्व विभाग स्थापन करावा लागला,' असं मोदी म्हणाले.