निकालांवर मोदी खूष; विजयाची खूण दाखवली!

नवी दिल्ली: गुजरात व हिमाचल प्रदेशच्या विधानसभा निवडणूक निकालांमध्ये भाजपनं बाजी मारल्यानं पंतप्रधान नरेंद्र मोदी यांचा चेहरा खुलला आहे. संसदीय कामकाजात भाग घेण्यासाठी आज सभागृहात प्रवेश करताना विजयाची खूण दर्शवत मोदींनी हा आनंद व्यक्त केला.

केंद्रातील सत्तेत साडेतीन वर्षं पूर्ण करणाऱ्या पंतप्रधान नरेंद्र मोदी यांच्यासाठी गुजरातची निवडणूक अत्यंत महत्त्वाची मानली जात होती. काँग्रेसचे नवे अध्यक्ष राहुल गांधी यांनी स्वत:ला प्रचारात झोकून दिले होते. दलित, ओबीसी व पटेल समाजाची मोट बांधून काँग्रेसनं भाजपसमोर कडवं आव्हान उभं केलं होतं. जीएसटी, नोटाबंदीच्या असंतोषाला हवा देऊन भाजपविरोधात जबरदस्त वातावरण निर्मितीही केली होती. गुजरातमध्ये सत्तापालट होईल, असे दावेही काँग्रेसकडून केले जात होते. मात्र, सगळे फॅक्टर फोल ठरवत भाजपनं पुन्हा एकदा गुजरात राखलं आहे. त्याचबरोबर, हिमाचल प्रदेशची सत्ता काँग्रेसकडून खेचून आणली आहे.

दोन्ही राज्यांमध्ये भाजपला विजयाचा कौल मिळणार, हे सकाळी साडेदहाच्या सुमारास स्पष्ट झाले. या दुहेरी विजयाचा आनंद पंतप्रधान मोदींच्या चेहऱ्यावर आज स्पष्ट दिसत होता. अधिवेशनाच्या निमित्तानं सभागृहात जात असताना मोदींनी सर्वप्रथम मीडियाकडं पाहून हात जोडले. नंतर हात उंचावून विजयाची (V) खूणही केली. मोदींचा हा व्हिडिओ सोशल मीडियावर वेगानं व्हायरल होत आहे. भाजप कार्यकर्त्यांनी देशभरात विजयी जल्लोष सुरू केला आहे.