मोदींना रस TRP राजकारणातच: राहुल गांधी

मटा ऑनलाइन वृत्त । नवी दिल्ली

काँग्रेस संसदीय पक्षाच्या बैठकीत पहिल्यांदाच अध्यक्षपदावरून बोलताना राहुल गांधी यांनी पंतप्रधान नरेंद्र मोदी यांच्यावर सडकून टिका केली. नरेंद्र मोदी हे स्वत:च्याच प्रतिमेत अडकलेले आहेत आणि त्यांना केवळ 'टीआरपीच्या राजकारणातच' इंटरेस्ट आहे, असा आरोप राहुल गांधी यांनी केला आहे.

आपल्या पंतप्रधानांच्या निरर्थक वक्तव्य आणि अक्षमतेमुळे देशाचे खूप नुकसान होत आहे, असे राहुल गांधी या बैठकीत म्हणाले.

आम्ही कधीही असा स्वत:ची प्रतिमा सुरक्षित राखण्यासाठी सामान्य माणसांना वेठीला धरणारा पंतप्रधान दिला नाही, असे ते म्हणाले. जम्मू-काश्मीरवरील वाढत्या हल्ल्यांवरही त्यांनी भाष्य केले. लष्कराच्या सर्जिकल स्ट्राइकनंतर जम्मू-काश्मीरमध्ये हल्ले वाढले आहेत, याकडे त्यांनी लक्ष वेधले. सर्जिकल स्ट्राइकनंतर १२ मोठे हल्ले आणि शेकडो वेळा शस्त्रसंधीचे उल्लंघन झाले असल्याचे त्यांनी सांगितले.

काँग्रेस आणि अन्य विरोधी पक्षांनी नोटाबंदीच्या प्रश्नावरून मोदी सरकारला गेले काही दिवस घेरले आहे.