भाजपचे विकासाचे राजकारणः मोदी

गोरखपूरः ‘भारतीय जनता पक्षातर्फे विकासाच्या राजकारणाला कायमच प्रोत्साहन दिले जाते,’ असे प्रतिपादन पंतप्रधान नरेंद्र मोदी यांनी शुक्रवारी येथे दिले. उत्तर प्रदेशातील आगामी निवडणुकीसाठी वातावरण निर्मिती करताना मोदी यांनी जातीपातीच्या आणि वशिल्याच्या राजकारणावर टीका केली. दलितांवरील अत्याचाराच्या मुद्द्याला मात्र त्यांनी बगल दिली.

भारतीय आयुर्विज्ञान संस्थेची (एम्स) पायाभरणी आणि आजारी खत कारखान्याच्या पुनरुज्जीवन सोहळ्यानंतर झालेल्या जाहीर सभेत मोदी यांनी राज्य सरकारवर टीका केली. मोदी म्हणाले, ‘तुम्हाला जातीयवादी आणि वशिलेबाज राजकारणाची गरज नाही. आतापर्यंत तुम्ही अनेकांचे खिसे भरले मात्र, तुमचे खिसे रिकामेच राहिले आहेत. तुम्ही लोकसभेतही मला आशीर्वाद दिले आहेत. तसेच उत्तर प्रदेशच्या विधानसभेसाठीही द्या. खत कारखाना सुरू झाल्याने गोरखपुरात गॅस पुरवठा होणार आहे. तो घराघरांत पोचवला जाईल. जर, वीज आणि गॅस उपलब्ध झाला तर, उद्योगांना अच्छे दिन आपोआपच येतील, ही उत्तर प्रदेशच्या पूर्वोत्तर भागातील औद्योगिक क्रांतीची सुरुवात असेल.’