'मोदींना दुसऱ्याच्या बाथरूममध्ये डोकवायला आवडतं'

मटा ऑनलाइन वृत्त । नवी दिल्ली

'पंतप्रधान नरेंद्र मोदी यांना गुगल सर्च करायला आणि दुसऱ्यांच्या बाथरूममध्ये डोकावायला आवडतं. मोकळ्या वेळामध्ये त्यांनी ते करायला आमची हरकत नाही. पण त्यांचा मुख्य काम देशाचा कारभार करणं हे आहे आणि त्यात ते पूर्णपणे नापास झाले आहेत,' अशी टीका काँग्रेसचे उपाध्यक्ष राहुल गांधी यांनी आज केली.

उत्तर प्रदेशातील पहिल्या टप्प्यातील मतदानाच्या पार्श्वभूमीवर राहुल गांधी व समाजवादी पक्षाचे नेते व मुख्यमंत्री अखिलेश यादव यांनी आज संयुक्त पत्रकार परिषद घेतली व आघाडीचा अजेंडा जाहीर केला. त्याचवेळी, राहुल व अखिलेश यांनी पंतप्रधान मोदी यांच्यावर टीकास्त्र सोडले. रेनकोट घालून आंघोळ करायची कला मनमोहन सिंग यांना चांगलीच अवगत आहे, अशी टीका मोदी यांनी अर्थसंकल्पावरील भाषणादरम्यान केली होती. तसंच, काँग्रेस नेत्यांच्या कुंडल्या माझ्याकडं आहेत, असं मोदी हरिद्वारच्या सभेत म्हणाले होते. राहुल यांनी त्यांच्या या टीकेला उत्तर दिलं. 'गेल्या अडीच वर्षांपासून तुम्ही पंतप्रधान आहात. तुम्ही कधीही आमची कुंडली काढू शकता,' असं आव्हान राहुल यांनी दिलं. 'मोदींची धोरणं विध्वंसक आहेत. रोजगार, सुरक्षा वा नोटाबंदीच्या प्रश्नांना ते उत्तरं देऊ शकत नाहीत. संपूर्ण देशाला हे माहीत आहे, असं सांगतानाच, 'यूपीच्या निवडणुकीचे निकाल मोदींना हादरवणारे असतील,' असं भाकीतही राहुल यांनी केलं.

अखिलेश यादव यांनीही मोदींना लक्ष्य केले. 'या निवडणुका राज्याचा विकास आणि प्रगतीसाठी लढल्या जात आहेत. त्यामुळं जास्त राग कामाचा नाही. इंटरनेटच्या जमान्यात सगळ्यांच्याच कुंडल्या एका क्लिकवर मिळतात. पंतप्रधानांनी उगाचंच लोकांची दिशाभूल करू नये. उत्तर प्रदेशसाठी काय केलं ते सांगावं,' असा टोला अखिलेश यांनी हाणला.