बेअरला हिंदी कशी समजली? मोदींनी केला उलगडा

नवी दिल्ली: डिस्कव्हरी चॅनेलवर नुकत्याच झालेल्या 'मॅन व्हर्सेस वाइल्ड' या कार्यक्रमात पंतप्रधान नरेंद्र मोदी आणि बेअर ग्रिल्स एकत्र दिसले. या कार्यक्रमात मोदी चक्क ब्रिटनमध्ये जन्मलेल्या बेअरशी हिंदीत बोलले आणि मोदींच्या म्हणण्याला तो प्रतिसादही देत होता. त्यामुळे बेअरला हिंदी कधीपासून यायला लागली? तो हिंदी शिकला का? असे प्रश्नही निर्माण झाले. मात्र मोदींनी या सर्व प्रश्नांना 'मन की बात' या कार्यक्रमातून उत्तर देताना बेअर आणि त्यांच्यामधील संभाषणाबाबतचं गुपीतही उघड केलं.

अनेक लोकांना बेअर ग्रिल्सला मी हिंदीत काय बोलत होतो, हे जाणून घ्यायची उत्सुकता होती. काहींनी तर हे शॉटस् एडिट किंवा अनेकवेळा चित्रीत केल्याचा तर्क लावला होता. प्रत्यक्षात मात्र यावेळी तंत्रज्ञान कामाला आले. हे तंत्रज्ञान बेअर ग्रिल्स आणि माझ्यातील दुवा होतं. बेअरच्या कानात एक वायरलेस उपकरण लावण्यात आले होते. त्यामध्ये मी हिंदीत बोलत असलेले शब्द इंग्रजीत भाषांतरित केले जात होते. त्यामुळे बेअरला मी काय बोलतो, हे कळत असल्याचा खुलासा मोदींनी केला.

डिस्कव्हरी चॅनेलवर १२ ऑगस्ट रोजी Man Vs Wild हा कार्यक्रम प्रदर्शित झाला होता. हा शो केवळ भारतातच नव्हे तर जगभरातील लोकांनी पाहिला. हा आजवरचा सर्वात मोठा ट्रेंडिंग टेलिव्हीजन इव्हेंट ठरला, असल्याचं बेअरने म्हटलं आहे.