पंतप्रधान मोदी मला घाबरतात: सिद्धरामय्या

मटा ऑनलाइन वृत्त | मैसूर

पंतप्रधान नरेंद्र मोदी मला घाबरतात. त्यामुळेच ते वारंवार मला लक्ष्य करतात, असे वक्तव्य कर्नाटकचे मुख्यमंत्री सिद्धरामय्या यांनी केले आहे. राज्यात माझी लोकप्रियता वाढली आहे. त्यामुळे मोदी कर्नाटकच्या दौऱ्यावर आल्यानंतर माझ्यावर टीका करतात, असेही ते म्हणाले.

पंतप्रधान मोदी नुकतेच कर्नाटकच्या दौऱ्यावर गेले होते. तेथे त्यांनी राज्यातील काँग्रेस सरकारवर टीका केली होती. त्यांच्या टीकेला सिद्धरामय्या यांनी उत्तर दिले आहे. मी राज्यात अनेक योजना राबवल्या आहेत. त्यामुळे मोदींच्या मनात माझ्याविषयी ईर्ष्या निर्माण झाली आहे. त्यांना येथील सत्ता हवी आहे. माझी लोकप्रियता वाढल्याने ते मला घाबरतात, असे ते म्हणाले.

राज्यातील नागरीक काँग्रेस सरकारला त्रासले आहेत असे मोदी म्हणाले होते, पण सत्तेत कोण राहील अथवा जाईल हे येथील नागरीक ठरवतील, असे उत्तरही त्यांनी दिले. दरम्यान, आपण असे बोललोच नसल्याचे सिद्धरामय्या यांनी सांगितले आहे. भाजप मला घाबरतो असे मी म्हणालो होतो. पंतप्रधान मला घाबरतात असे मी बोललोच नाही, असे स्पष्टीकरण त्यांनी दिले.