मोदींच्या 'योगा डे' व्हिडिओसाठी काहीच खर्च नाही: राठोड

नवी दिल्ली

'जागतिक योग दिनानिमित्त पंतप्रधान नरेंद्र मोदी यांच्या व्हिडिओसाठी एकही पैसा खर्च झालेला नाही, हा व्हिडिओ पंतप्रधान कार्यालयाच्या व्हिडिओग्राफरनंच तयार केला आहे', असं स्पष्टीकरण देत माहिती आणि प्रसारण, तसेच क्रीडा मंत्री राज्यवर्धन राठोड यांनी काँग्रेसचे नेते, खासदार शशी थरूर यांच्यावर अफवा पसरवण्याचा आरोप केला आहे. एका बातमीचा हवाला देत शशी थरूर यांनी ट्विट करत मोदी सरकारवर टीकास्त्र सोडलं होतं. त्यावर राठोड यांनी ट्विट करत थरूर यांना फटकारले आहे.

योगदिनानिमित्त जाहिरातबाजीवर वारेमाप खर्च झाल्याचे म्हणत शरूर यांनी मोदी सरकारवर ताशेरे ओढले होते. थरूर ट्विटमध्ये म्हणतात, 'योग दिनाच्या जाहिरातीसाठी २० कोटी रुपये खर्च करण्यात आले असून, हे लज्जास्पद आहे. हे सरकार केवळ खोट्या वल्गना करत आहे. या सरकारनं सर्व आशा- आकांक्षा उद्ध्वस्त करून टाकल्या आहेत. मोदी सरकारसाठी आशेची जागा अतिशयोक्तीनं घेतली आहे.'



यावर उत्तर देत केंद्रीय मंत्री राज्यवर्धन राठोड यांनी थरूर यांच्यावर टीकास्त्र सोडलं. ते आपल्या ट्विटमध्ये म्हणतात, ' थरूर यांनी असं म्हणणं यात आश्चर्य नाही. खोटेपणा हेच थरूर यांच्यादृष्टीने सत्य आहे. पंतप्रधानांच्या व्हिडिओवर एकही पैसा खर्च करण्यात आलेला नाही. पंतप्रधान कार्यालयाच्या व्हिडिओग्राफरनं हा व्हिडिओ रेकॉर्ड केला आहे.' याबाबतचे वृत्त हे केवळ अफवेवर आधारित असल्याचेही राठोड म्हणाले.



पंतप्रधान नरेंद्र मोदी यांनी १३ जूनला योग करतानाचा व्हिडिओ ट्विट केला होता. याद्वारे पंतप्रधानांनी योग आणि ध्यानाबाबत आपला अनुभव कथन केला आहे.