मोदींना जनता हनुमानासारखी हवीय!

मटा ऑनलाइन वृत्त । पाटणा

पंतप्रधान नरेंद्र मोदी हे प्रभू राम बनू पाहत आहेत. त्यांना जनता हनुमानासारखी म्हणजेच ते सांगतील ते निमूटपणे ऐकणारी हवी आहे, अशा शब्दांत राष्ट्रीय जनता दलाचे अध्यक्ष लालूप्रसाद यादव यांनी आज मोदींवर निशाणा साधला.

पंतप्रधान मोदींना हुकूमशहासारखं शासन करायचं आहे. याचा शेवट अर्थातच संपूर्ण व्यवस्था नष्ट होण्यात आहे, असे लालू म्हणाले. मी राम व्हावं आणि लोकांनी हनुमान असावं, कोणताही प्रतिसवाल न करता प्रत्येक म्हणणं ऐकावं, असे पंतप्रधानांना वाटत आहे. असं सरकार असेल तर देशाचा विकास होऊ शकत नाही आणि देश सुरक्षितही राहू शकत नाही, असं टीकास्त्र लालूंनी सोडलं.

नोटाबंदीनंतर काश्मीरमधील दगडफेक थांबेल, नक्षलवादी कारवाया थांबतील, असे पंतप्रधान म्हणाले होते मात्र सगळं उलट झालंय. महागाई वाढली आहे. बेकारी आणि जातीयताही वाढली आहे, असे लालू म्हणाले. भाजप सत्तेत आल्यापासून पाकिस्तानकडून सीमेवर होणारे हल्ले वाढले आहेत, असा आरोपही लालूंनी केला.