kathua rape: त्या मुलींना न्याय दिला जाईल

नवी दिल्ली: कठुआ आणि उन्नाव बलात्कार प्रकरणाच्या घटनांवर पंतप्रधान नरेंद्र मोदी यांनी अखेर मौन सोडलं आहे. 'कठुआ आणि उन्नावच्या घटना देशासाठी लज्जास्पद आहेत. या दोन्ही घटनेतील आरोपींना कठोरातील कठोर शिक्षा दिली जाईल. गुन्हेगारांना शिक्षा देणं ही आमची जबाबदारी आहे. पीडित मुलींना न्याय दिला जाईल,' असा विश्वास पंतप्रधान नरेंद्र मोदी यांनी आज देशवासियांना दिला.

दिल्लीच्या २६, अलिपूर रोडवरील भारतरत्न डॉ. बाबासाहेब आंबेडकर यांच्या स्मारकाचं उद्धाटन करताना नरेंद्र मोदी यांनी हा विश्वास दिला. 'गेल्या दोन दिवसातील घटना लज्जास्पद आहेत. या घटनांमुळे देशाची मान शरमेनं झुकली आहे. मात्र या गुन्ह्यातील आरोपींना कठोर शिक्षा दिली जाईल. त्या मुलींना न्याय दिला जाईल,' असं मोदींनी सांगितलं. अशा घटनांवर समाजानेही विचार केला पाहिजे. या घटना घडू नये म्हणून दक्ष राह्यला हवं, असंही त्यांनी स्पष्ट केलं.

गेल्या दोन दिवसांतील या घटनांनी सामाजिक न्यायाच्या तत्त्वाला आव्हान दिलं आहे. कोणत्याही सभ्य समाजासाठी या घटना लाजिरवाण्याच आहे, असंही त्यांनी सांगितलं.