काश्मीरबाबत संभ्रम; मोदी मंत्रिमंडळाची उद्या बैठक

नवी दिल्ली: जम्मू-काश्मीरमधील सद्यपरिस्थितीबाबत संभ्रम असतानाच, मोदी सरकारने उद्या, सोमवारी मंत्रिमंडळाची बैठक बोलावली आहे. विशेष म्हणजे, एरवी मंत्रिमंडळाची बैठक बुधवारी होते; मात्र यावेळी संसद अधिवेशनाचे कामकाज सुरू होण्याआधी बैठक होणार आहे. या बैठकीतील संभाव्य निर्णयाकडे सर्वांचे लक्ष लागले आहे.

काश्मीरमध्ये हजारोंच्या संख्येने सुरक्षा दलांचे जवान तैनात करण्यात आले आहेत. काश्मीरमध्ये शिक्षण घेणाऱ्या बाहेरील राज्यांच्या विद्यार्थ्यांना परत जाण्याचे निर्देश देण्यात आले आहेत. त्यातच कलम ३७० आणि ३५ अ रद्द करण्याबाबत अनेक कयास बांधले जात आहेत. तसंच तीन स्वतंत्र राज्यांची निर्मिती करण्याचा निर्णय कोणत्याही क्षणी घेतला जाऊ शकतो, अशी चर्चा आहे. त्यामुळे राज्यातील नागरिकांमध्ये भीतीचे आणि संभ्रमाचे वातावरण आहे. त्यात केंद्रातील मोदी सरकारने अचानक मंत्रिमंडळाची बैठक बोलावली आहे. उद्या, सोमवारी संसद अधिवेशनाचे कामकाज सुरू होण्यापूर्वी सकाळी साडेनऊ वाजता ही बैठक होणार आहे. या बैठकीत कोणता निर्णय होतो याबाबत कमालीची उत्सुकता आहे. संसदेचं अधिवेशन अजून दोन दिवसांसाठी वाढवण्याचा विचार या बैठकीत होऊ शकतो असंही सांगितलं जातं.