पंतप्रधान मोदींनी केली पूरग्रस्त भागाची पाहणी

वृत्तसंस्था, अहमदाबाद
पंतप्रधान नरेंद्र मोदी यांनी मंगळवारी उत्तर गुजरातमधील पूरग्रस्त बनासकांठा आणि पाटण जिल्ह्यांची हवाई पाहणी केली. या ठिकाणी हजारो नागरिक बेघर झाले आहेत. मोदी मंगळवारी दुपारी अहमदाबाद येथे आले. त्यानंतर त्यांनी या भागांची हवाई पाहणी केली.

पंतप्रधानांनी नंतर उच्चस्तरीय बैठकही घेतली. या बैठकीला गुजरातचे मुख्यमंत्री विजय रुपानी, उपमुख्यमंत्री नितीन पटेल आणि काही वरिष्ठ अधिकारी उपस्थित होते. हवाई दल आणि राष्ट्रीय आपत्ती प्रतिसाद दलातर्फे बचावकार्यही सुरू आहे. बनासकांठा आणि पाटण जिल्ह्यात पूरग्रस्त भागातील नागरिकांना सुरक्षित स्थळी स्थलांतरित करण्यात आले आहे.

गेल्या २४ तासांत बनासकांठा जिल्ह्यातील १२ तालुके आणि पाटण आणि साबारकांठा जिल्ह्यात सुमारे २०० मिमी पाऊस झाला असल्याची माहिती एसईओसीने दिलेल्या अहवालात म्हटले आहे.

बनासकांठातील दांतिवाडा येथे सर्वाधिक ४६२ मिमी एवढा पाऊस झाला असून, त्या खालोखाल पालनपूर (३८० मिमी), वडगम (३५७ मिमी), अमिरगढ (३३७ मिमी), लखानी (३०५ मिमी) या ठिकाणी पाऊस झाला.

बनासकांठा जिल्ह्यातील ४०० जणांची मंगळवारी सकाळी सुटका करण्यात आली असून, गेल्या तीन दिवसांपासून उत्तर गुजरातमध्ये जोरदार पाऊस पडत असल्याने अनेक नागरिकांचे स्थलांतर करण्यात आले आहे, तर अद्याप हजारो लोक सुरक्षितस्थळी स्थलांतर होण्याच्या प्रतीक्षेत आहेत.