ट्रम्प यांच्याशी सलोख्याचे संबंधः PM मोदी

मटा ऑनलाइन वृत्त । नवी दिल्ली

अमेरिकेच्या अध्यक्षपदी निवडून आलेल्या डोनाल्ड ट्रम्प यांच्याशी माझा चांगला सलोखा आहे. यामुळे आगामी काळात ट्रम्प यांचा कल कायम भारताच्या बाजूने असेल, अशी आशा पतंप्रधान नरेंद्र मोदी यांनी व्यक्त केली आहे.

लोकसभा अध्यक्ष सुमित्रा महाजन यांनी नेत्यांसाठी डिनर आयोजित केले होते. या वेळी डोनाल्ड ट्रम्प यांचा विजय आणि त्याचे पडसाद या मुद्द्यावर औपचारीक चर्चा झाली. यावेळी पंतप्रधान नरेंद्र मोदींनी ट्रम्प यांच्याबाबत आपली भूमिका मांडली.

ट्रम्प यांच्याशी माझे चांगले संबंध आहेत. तसंच भारत-अमेरिकेत प्रस्थापित झालेल्या मैत्रीपूर्ण संबंधांमध्ये कुठलाही बदल होणार नाही, असं मोदी म्हणाले. ट्रम्प यांच्याशी तुम्ही कसे जुळवून घेणार? असा प्रश्न मोदींना करण्यात आला होता.

डेमोक्रॅट पक्षाचे बराक ओबामा असोत की रिपब्लिकन पक्षाचे डोनाल्ड ट्रम्प भारताच्या बाबतीत अमेरिकेची भूमिका मैत्रीपूर्णच राहिली आहे, असं मोदींनी स्पष्ट केलं.