मोदी युगपुरुष, त्यांना भारतरत्न द्या: खासदाराची मागणी

नवी दिल्ली: जम्मू आणि काश्मीर राज्याच्या विभाजनाचा निर्णय घेणारे पंतप्रधान नरेंद्र मोदी हे युगपुरुष असून त्यांना भारतरत्न हा देशाचा सर्वोच्च नागरी पुरस्कार देण्यात यावा अशी मागणी भारतीय जनता पक्षाचे खासदार गुमानसिंह डामोर यांनी केली आहे. लोकसभेत शून्य प्रहारावेळी त्यांनी ही मागणी केली. जम्मू आणि काश्मीरबाबतचा निर्णय घेऊन मोदींनी कोट्यवधी भारतीयांना आनंदीत केले आहे. या कामगिरीमुळे त्यांना भारतरत्न देण्यात यावा अशी आपण मागणी करत असल्याचे डामोर म्हणाले.

जगातील अनेक देशांनी पंतप्रधान नरेंद्र मोदी यांचा पुरस्कार देऊन गौरव केल्याचा उल्लेखही डामोर यांनी लोकसभेत केला. यावेळी त्यांनी जम्मू आणि काश्मीरमधून कलम ३७० हटवण्याच्या निर्णयाचे कौतुक केले.

केंद्रीय गृहमंत्री अमित शहा यांनी काल राज्यसभेत आणि आज लोकसभेत जम्मू आणि काश्मीर राज्याच्या पुनर्रचनेबाबतचे विधेयक मांडले. राज्यसभेत हे विधेयक मंजूर करण्यात आले. त्यानंतर देशभर प्रतिक्रिया उमटल्या. अनेक ठिकाणी नागरिकांनी आनंद साजरा केला. काँग्रेससह अन्य काही विरोधी पक्षांनी मात्र केंद्र सरकारच्या या निर्णयावर टीकास्त्र सोडले.