नोटाबंदींच्या निर्णयावर जशोदाबेन खुश!

मटा ऑनलाइन वृत्त । कोटा

नोटाबंदीच्या निर्णयावर पंतप्रधान नरेंद्र मोदी आणि केंद्र सरकारविरोधात विरोधक टीका करत असले तरी पंतप्रधान मोदींच्या निर्णयाला त्यांची पत्नी जशोदाबेन यांनी पाठिंबा दिला आहे. जशोदाबेन यांनी सरकारच्या निर्णयाचे आणि कामाचे कौतुक केले आहे.

जशोदाबेन राजस्थानमधील एका कार्यक्रमात प्रमुख पाहुण्या म्हणून उपस्थित होत्या. त्यावेळी त्यांना केंद्र सरकारच्या निर्णयाबाबत प्रश्न विचारण्यात आले. त्यावेळी त्यांनी केंद्र सरकारच्या कामगिरीचे कौतुक केले. केंद्र सरकारने ५०० आणि १०००च्या नोटा बंद करण्याचा घेतलेला निर्णय देशहिताचा असून यामुळे भ्रष्टाचार आणि काळा पैसा संपेल. शिवाय या निर्णयामुळे परदेशातील काळा पैसाही देशात येईल असे जशोदाबेन यांनी म्हटले.

पंतप्रधान नरेंद्र मोदी यांच्या नेतृत्वातील केंद्र सरकार चांगले काम करत असल्याची पोचपावती त्यांनी दिली. केंद्र सरकार देशाच्या चांगल्या भवितव्यासाठी, प्रगती काम करत असून यापुढेही सरकार असे काम करत राहिल अशी अपेक्षाही त्यांनी व्यक्त केली.