या, राष्ट्रहिताची चर्चा करू; मोदींचं आवाहन

मटा ऑनलाइन वृत्त । नवी दिल्ली

पाचशे व एक हजार रुपयांच्या नोटा चलनातून बाद करण्याच्या निर्णयावरून संसदेत केंद्र सरकारला घेरण्याच्या तयारीत असलेल्या विरोधकांना पंतप्रधान नरेंद्र मोदी यांनी आज आपल्या खास शैलीत शांत करण्याचा प्रयत्न केला. 'आजपासून सुरू होणाऱ्या अधिवेशनात राष्ट्रहिताच्या मुद्द्यांवर चर्चा करू या,' अशी साद मोदी यांनी विरोधकांनी घातली.

संसदेचे हिवाळी अधिवेशन आजपासून सुरू होत आहे. अधिवेशन सुरू होण्याच्या काही वेळ आधी मोदी यांनी संसद भवनाच्या आवारात पत्रकारांशी संवाद साधला. 'मागील अधिवेशनात जीएसटीसारखे ऐतिहासिक विधेयक संमत झाले. विधेयक संमत करण्यासाठी सहकार्य केल्याबद्दल मी तेव्हा सर्वपक्षीयांचे आभार मानले होते. यावेळी देखील अशाच राष्ट्रहिताच्या प्रश्नांवर चर्चा व्हायला हवी,' अशी अपेक्षा मोदी यांनी व्यक्त केली.

'सरकार सर्व महत्त्वाच्या मुद्द्यावर खुली चर्चा करण्यास तयार आहे. प्रत्येक राजकीय पक्षाची भूमिका आणि त्यांच्या आक्षेपांची दखल घेतली जाईल. सर्वांना सोबत घेऊन पुढं जाण्याचा आमचा प्रयत्न असेल,' असं मोदी म्हणाले.