जंगलात लाकडं गोळा करताना रस्त्यात सापडली 'लाखमोला'ची वस्तू; गरीब महिलेचे नशीब फळफळले

मध्यप्रदेशः मध्य प्रदेशातील पन्ना शहरातील एका गरीब आदिवासी महिलेचं नशीब पालटलं आहे. जंगलात लाकडं गोळा करायला जात असताना महिलेला एक अनमोल वस्तू सापडली आहे. लाकडं गोळा करत असताना महिलेला ४. ३९ कॅरेटचा हिरा पडलेला सापडला. या हिऱ्याची किंमत लाखोच्या घरात आहे. यामुळं या महिलेचे नशीब फळफळले आहे. हा हिरा महिलेने सरकारी कार्यालयात जमा केला आहे.

महिलेल्या सापडलेल्या हिऱ्याची किंमत अंदाजे २० लाख इतकी आहे. गेंदा बाई असं या महिलेचे नाव असून ती जंगलात लाकडं गोळा करायला गेली होती. लाकडं गोळा करत असताना तिला मौल्यवान ४. ३९ कॅरेटचा हिरा सापडला. हिऱ्याची पारख करता न आल्याने तिने तो कार्यालयात जमा केला, अशी माहिती अधिकारी अनुपम सिंह यांनी दिली आहे.

हिरा सापडल्यानंतर महिलेला हिऱ्याची पारख करता आली नाही. त्यामुळं ती तो हिरा घेऊन सरकारी कार्यालयात गेली. तिथे गेल्यानंतर हिरा खरा आहे की खोटा याची तपासणी करण्यात आली. त्यानंतर अधिकाऱ्यांनी हा हिरा कार्यालयात जमा करुन घेतला.

वाचाः चिकन तंदुरी ते गाजराचा हलवा; संसद परिसरात आंदोलनाला बसलेल्या खासदारांचा जेवणाचा मेन्यू पाहिलात का!

संबंधित महिला ही, पन्ना नगरमध्ये वॉर्ड क्रमांक २७ येथे राहते. बुधवारी तुरुंगाच्या मागे असलेल्या जंगलात ती लाकडं गोळा करण्यासाठी गेली होती. त्याचवेळी रस्त्यावर तिला एक चकाकणारी दगडासारखी वस्तू आढळून आली. ते घेऊन महिला घरी आली. घरी आल्यानंतर तीने ती वस्तू तिच्या पतीला दाखवली. दोघांनाही ही वस्तू नेमकी काय आहे. हे समजले नाही. म्हणून त्यांनी सरकारी कार्यालय गाठलं. तिथे त्यांना हा हिरा असल्याचं सांगण्यात आलं.

वाचाः पाण्यासाठी महिलांची जीवघेणी कसरत; मुख्यमंत्री शिंदे सावरपाड्याला भेट देण्याची शक्यता

हा हिरा सरकारी कार्यालयात जमा करण्यात आला आहे. याचा लिलाव करण्यात येईल. लिलावानंतर जी रक्कम येईल त्यातला कर कापून ती रक्कम या महिलेला देण्यात येईल. हिरा मिळाल्यानंतर या महिलेचं नशीब पालटलं आहे. ही महिला मजदूरी व लाकडं विकून आपला उदरनिर्वाह चालवते. तिला चार मुलं व दोन मुली आहेत. आर्थिक परिस्थिती हलाखीची असल्याने त्यांचे शिक्षण पूर्ण होऊ शकले नाही. हिराच्या लिलावातून मिळालेले पैशांतून ती घर बांधणार असून उरलेले पैसे मुलांच्या लग्नासाठी ठेवणार आहे.

वाचाः मित्राच्या घरी पार्टी करायला गेला अन् घडले अघटित; दोघांच्या भांडणात तिसऱ्याचाच जीव गेला