‘पीपीए’ भाजपमध्ये विलीन होणार?

Bikash.Singh@timesgroup.com

गुवाहाटी (ईटी वृत्त) : अरुणाचल प्रदेशचे मुख्यमंत्री कलिखो पुल यांचा ‘पीपल्स पार्टी ऑफ अरुणाचल (पीपीए) हा पक्ष लवकरच भारतीय जनता पक्षामध्ये विलीन होण्याची शक्यता आहे. हा पक्ष भाजपमध्ये विलीन करावा, असे मत भारतीय जनता पक्षातील काही वरिष्ठ नेत्यांनी व्यक्त केले आहे. ईशान्य भारतामध्ये आसामनंतर अरुणाचल प्रदेशमध्ये भाजपचा प्रभाव वाढण्यासाठी याबाबत लवकर निर्णय होणे आवश्यक असल्याचे सूत्रांचे म्हणणे आहे.

काँग्रेसचे पदच्युत मुख्यमंत्री नबाम तुकी यांच्यावर नाराज असलेल्या काँग्रेसच्या ३० बंडखोर आमदारांनी मार्च महिन्यामध्ये ‘पीपीए’मध्ये प्रवेश केला होता. त्या पार्श्वभूमीवर ‘पीपीए’ने भाजपमध्ये विलीन व्हावे, अशी मागणी भाजपमध्ये पुढे येत आहे. सध्या कलिखो पुल यांच्या सरकारला भाजपचा बाहेरून पाठिंबा आहे.

भाजपमधील एका वरिष्ठ नेत्याने दिलेल्या माहितीनुसार, याबाबतचा अंतिम निर्णय २९ जून रोजी भाजपचे राष्ट्रीय अध्यक्ष अमित शहा घेणार आहेत. लवकरात लवकर कलिखो पुल यांचा पक्ष भाजपमध्ये विलीन करण्याबाबत निर्णय घेणार आहेत. अरुणाचल प्रदेशचे भाजप प्रदेशाध्यक्ष तापिर गाओ यांनीही या वृत्ताला दुजोरा दिला आहे.