प्रद्युम्न हत्येप्रकरणी सीबीआय चौकशीची घोषणा

मटा ऑनलाइन वृत्त । गुरुग्राम

गुरुग्राममधील रायन इंटरनॅशनल शाळेतील प्रद्युम्न ठाकूर या ७ वर्षाच्या विद्यार्थ्याच्या हत्येची सीबीआय चौकशी होणार आहे. हरयाणाचे मुख्यमंत्री मनोहर लाल खट्टर यांनी प्रद्युम्न हत्येप्रकरणी सीबीआय चौकशीची शिफारस केली आहे.

मुख्यमंत्री खट्टर हे प्रद्युम्नच्या शोक सभेत आज सहभागी झाले. त्यांनी प्रद्युम्नच्या पालकांचे सांत्वन केले. यावेळी खट्टर यांनी प्रद्युम्न हत्येप्रकरणी सीबीआय चौकशीची घोषणा केली. 'रायन स्कूलमधील प्रद्युम्नच्या हत्येची घटना अतिशय निंदाजनक आहे. या प्रकरणी शाळेविरोधात जनतेत रोष आहे. लोकांच्या तीव्र भावना आहेत आणि त्यांच्या मागणीवरून प्रद्युम्न हत्येची सीबीआय चौकशी करण्यास राज्य सरकार तयार आहे', असं खट्टर म्हणाले. यासंबंधी राज्य सरकारने सीबीआयला पत्रही पाठवले आहे. तसंच 'रायन स्कूल तीन महिन्यांसाठी ताब्यात घेण्याचा निर्णयही सरकारने घेतला आहे. या काळात शाळेतील सर्व हालचालींवर सरकारची नजर असेल', असं खट्टर यांनी सांगितलं.

'राज्य सरकारवर आमचा पूर्व विश्वास आहे. अशा प्रकारच्या घटना पुन्हा होऊ नये, हीच आमची मागणी आहे', असं प्रद्युम्नचे वडील वरुण ठाकूर म्हणाले. प्रद्युम्नच्या हत्येच्या पहिल्या दिवसापासून ते सीबीआय चौकशीची मागणी करत होते.