- प्रज्ञा यांनी बुधवारी लोकसभेत गोडसेला देशभक्त म्हटले होते
- प्रज्ञा यांच्या विधानाविरोधात विरोधी पक्ष आक्रमक
- बिनशर्त माफी मागण्याची जोरदार मागणी
..
म. टा. विशेष प्रतिनिधी, नवी दिल्ली
महात्मा गांधींची हत्या करणाऱ्या नथुराम गोडसेला कथितपणे देशभक्त म्हटल्याच्या आरोपावरून शुक्रवारी लोकसभेत भाजप खासदार प्रज्ञा सिंह ठाकूर यांनी एक निवेदन वाचून माफी मागितली. मात्र, त्यांच्या माफीमुळे विरोधी पक्षांच्या सदस्यांचे समाधान झाले नाही आणि त्यांनी गोंधळ घालून प्रज्ञा सिंह यांनी बिनशर्त माफी मागावी, अशी मागणी केली. शेवटी सर्वपक्षीय बैठकीत ठरल्यानुसार प्रज्ञा सिंह दुसऱ्यांदा माफी मागितल्याने या प्रकरणावर पडदा पडला.
प्रज्ञा सिंह यांनी बुधवारी लोकसभेत नथुराम गोडसेला कथितपणे देशभक्त म्हटले होते. त्यांच्या वादग्रस्त विधानाचा कामकाजात सुरुवातीपासूनच समावेश केला नाही, असे लोकसभा अध्यक्ष ओम बिर्ला यांनी स्पष्ट केले. जी कृती सभागृहाच्या कामकाजाचा भागच नाही, त्यावर चर्चा व्हावी काय यावरही सभागृहाने विचार करावा, असे बिर्ला म्हणाले. कामकाजात समावेश नसला तरी या विधानाची जगभरात दखल घेतली गेली आहे. सभागृहात महात्मा गांधी यांच्याबद्दल काढलेल्या अनुद्गाराबद्दल प्रज्ञा सिंह यांनी बिनशर्त माफी मागावी, अशी मागणी ए. राजा यांनी केली. प्रज्ञा सिंह यांना संसदीय पक्षाच्या बैठकीपासून दूर ठेवत आणि संरक्षण मंत्रालयाच्या सल्लागार समितीवरून काढून टाकत भाजपने आपली नाराजी व्यक्त केली आहे. त्यांनी एका ओळीची बिनशर्त माफी मागावी, असे तृणमूल काँग्रेसचे सुदीप बंडोपाध्याय म्हणाले. मागच्या अधिवेशनात एका सदस्याला ज्या पद्धतीने माफी मागायला लावली होती. त्याच पद्धतीने माफी मागितली जावी, असे बसपचे दानिश अली म्हणाले. नथुराम देशभक्त होता की मारेकरी होता, हे सत्ताधारी भाजपने स्पष्ट करावे. नथुराम गोडसे देशभक्त नसून अतिरेकी आणि महात्मा गांधींचा मारेकरी होता, असे प्रज्ञा सिंह यांनी सांगावे, अशी मागणी असदुद्दीन ओवैसी यांनी केली.
सभागृहात कोणत्याही टिप्पणीमुळे कुठल्याही प्रकारे कुणाच्याही भावना दुखावल्या असतील आपण त्याविषयी खेद व्यक्त करतो. पण आपण हेही नमूद करू इच्छिते की लोकसभेत आपण केलेल्या विधानांचा विपर्यास करण्यात आला आहे. आपल्या विधानाचा संदर्भ वेगळाच होता आणि ते विधान चुकीच्या पद्धतीने मांडण्यात आला. महात्मा गांधींनी केलेल्या देशाप्रती केलेल्या सेवेचा आपण सन्मान करीत असल्याचे प्रज्ञा सिंह म्हणाल्या. काँग्रेसचे नेते राहुल गांधी यांचे नाव न घेता याच सभागृहाच्या एका सन्माननीय सदस्याने आपल्याला जाहीरपणे अतिरेकी म्हटले, हे आपण येथे निदर्शनास आणून देऊ इच्छितो, असे प्रज्ञा सिंह म्हणाल्या.
आपल्याविरुद्ध तत्कालिन सरकारने रचलेल्या षडयंत्रांनंतरही न्यायालयात माझ्याविरुद्ध कोणतेही आरोप सिद्ध झालेले नाहीत. दोषी न ठरविले नसताना मला अतिरेकी म्हणणे हे कायद्याविरुद्ध आहे. आरोप सिद्ध न होताही अतिरेकी म्हणणे हे एक महिला आणि संन्याशी आणि खासदाराच्या नात्याने आपल्या सन्मानावर हल्ला करन अपमानित करण्याचा प्रयत्न आहे. तत्कालिन सरकारने माझ्याविरुद्ध षडयंत्र रचून माझा शारीरिक, मानसिक रूपाने छळ करण्यात आला, असा आरोप प्रज्ञा सिंह ठाकूर यांनी निवेदनात केला.
...
काँग्रेसची निदर्शने
प्रज्ञा सिंह यांनी गोडसेचा उल्लेख 'देशभक्त' असा केल्यामुळे संतप्त झालेल्या राष्ट्रीय युवक काँग्रेसच्या कार्यकर्त्यांनी शुक्रवारी संसदेसमोर निदर्शने केली. यावेळी ठाकूर आणि भाजपविरोधी घोषणा देण्यात आल्या. त्यांना पोलिसांनी कृषी भवन इमारतीजवळ अडविले.