VHP: तोगडियांची हकालपट्टी होणार!

नवी दिल्ली: राम मंदिराच्या मुद्द्यावरून भाजप आणि राष्ट्रीय स्वयंसेवक संघाला कोंडीत पकडणारे विश्व हिंदू परिषदेचे कार्यकारी अध्यक्ष प्रवीण तोगडिया यांची विहिंपमधून गच्छंती करण्याचा निर्णय घेण्यात आला आहे. १४ एपिल रोजी विहिंपच्या कार्यकारी बोर्डाची बैठक होणार असून त्यात तोगडिया आणि विहिंपचे अध्यक्ष राघव रेड्डी यांची पदावरून हकालपट्टी करण्यात येणार आहे. त्यांच्या जागी या दोन्ही पदावर संघाच्या स्वयंसेवकांची निवड करण्यात येणार असल्याचं सूत्रांनी सांगितलं.

लवकरच बैठकीचे आयोजन करून संघटनेच्या संविधानानुसार निवडणुका घेण्याचे आदेश राष्ट्रीय स्वयंसेवक संघाने विहिंपला दिले आहेत. विशेष म्हणजे विहिंपच्या या बैठकीला संघाचे बडे अधिकारीही उपस्थित राहणार आहेत, असं सूत्रांनी सांगितलं. तोगडियांना विहिंपच्या कार्यकारी अध्यक्षपदी आणि रेड्डींना अध्यक्षपदी ठेवण्याची संघाची इच्छा नाही. संघानं विहिंपच्या अध्यक्षपदासाठी व्ही. कोकजे यांचं नाव सुचवलं आहे. १४ एप्रिल रोजी गुरुग्राममध्ये होणाऱ्या विहिंपच्या बैठकीत कोकजे यांच्या नावावर शिक्कामोर्तब होण्याची दाट शक्यता आहे.

गेल्या डिसेंबरमध्येच तोगडिया आणि रेड्डी यांच्या पदाचा कार्यकाळ संपला होता. त्यानंतर नव्या अध्यक्षाच्या निवडीसाठी २९ डिसेंबर रोजी भुवनेश्वरमध्ये बैठक झाली होती. त्यावेळीही कोकजे यांचं नाव विहिंपच्या अध्यक्षपदासाठी पुढे करण्यात आलं होतं. मात्र तोगडिया आणि त्यांच्या समर्थकांनी गोंधळ घालत त्याला विरोध केला होता. त्यामुळे नव्या अध्यक्षाची निवड होऊ शकली नव्हती.

...म्हणून गच्छंती होणार!

तोगडिया यांनी गुजरातमध्ये भाजपविरोधात काम केलं होतं. पाटीदार समाजाचे नेते आणि काँग्रेसचे समर्थक हार्दिक पटेल यांच्याशी तोगडियांनी संधान साधलं होतं, त्याचे पुरावे संघाकडं आहेत. तोगडियांनी पंतप्रधान नरेंद्र मोदी, भाजप आणि संघावरही आरोप केले होते. त्यामुळं त्यांना पदमुक्त करण्याचा निर्णय घेण्यात आल्याचं सांगण्यात येतं.

कोण आहेत व्ही. कोकजे?

प्रवीण तोगडिया यांच्या जागी विश्व हिंदू परिषदेच्या आंतरराष्ट्रीय कार्यकारी अध्यक्षपदासाठी चर्चेत असलेले व्ही. कोकजे यांचं संपूर्ण नाव विष्णू सदाशिव कोकजे आहे. सध्या ते विहिंपचे आंतरराष्ट्रीय उपाध्यक्ष आहेत. १९३९ साली मध्य प्रदेशात जन्मलेल्या कोकजे यांनी २००३ ते २००८ या कालावधीत हिमाचल प्रदेशचं राज्यपालपद भूषवलं आहे. त्यांनी मध्य प्रदेश उच्च न्यायालयाचे न्यायमूर्ती तसंच, राजस्थान उच्च न्यायालयाचे प्रभारी मुख्य न्यायमूर्ती म्हणूनही काम पाहिलं आहे. संघ परिवाराची शाखा असलेल्या भारत विकास परिषदेचे ते माजी अध्यक्ष आहेत.