प्रवीण तोगडियांसाठी हार्दिक मैदानात

अहमदाबाद: विश्व हिंदू परिषदेचे नेते प्रवीण तोगडिया यांनी पोलिसांवर केलेल्या एन्काउंटरच्या कटाच्या आरोपांनंतर पाटीदार पटेलांचा नेता हार्दिक पटेल त्यांच्या बाजूनं मैदानात उतरला आहे. 'तोगडियांच्या विरोधात पंतप्रधान नरेंद्र मोदी व भाजपाध्यक्ष अमित शहा हे कट-कारस्थान रचत आहेत,' असा थेट आरोप हार्दिकनं केला आहे.

प्रकृती अस्वास्थामुळं रुग्णालयात उपचार घेत असलेल्या तोगडिया यांची हार्दिकनं आज भेट घेतली. त्यांच्या प्रकृतीची विचारपूस केली. त्यानंतर मीडियाशी बोलताना त्यानं मोदी-शहा यांच्यावर टीकास्त्र सोडलं. 'प्रवीण तोगडियांची अनेक मतं मला पटत नाहीत. मात्र, त्यांच्या विरोधात कट-कारस्थान होत असल्याचा आरोप खरा आहे. मोदी व शहा यांच्या सांगण्यावरूनच हे सगळं सुरू आहे. राष्ट्रीय स्वयंसेवक संघ तोगडियाच्या विरोधात आहे हे उघड गुपित आहे,' असंही हार्दिक म्हणाला.

तोगडिया बेपत्ता झाल्याचं वृत्त पसरल्यानंतरही हार्दिकनं ट्विटरवरून मोदी सरकारवर हल्ला चढवला होता. झेड प्लस सुरक्षा असतानाही प्रवीण तोगडिया बेपत्ता होतात. मग सामान्य माणसाचं काय होऊ शकतं, याची कल्पनाही करवत नाही,' असं त्यानं म्हटलं होतं. 'तोगडियांच्या जिवाला धोका आहे, असं त्यांनी स्वत:च याआधी सांगितलं होतं. पण त्याकडं दुर्लक्ष केलं गेलं. मनमोहन सिंग सरकारच्या काळात तोगडिया बेपत्ता झाले असते तर भाजपनं संपूर्ण देशभरात हिंसाचार माजवला असता,' असंही तो म्हणाला होता.