राष्ट्रपती निवडणूक: रामनाथ कोविंद आघाडीवर

मटा ऑनलाइन वृत्त । नवी दिल्ली

संपूर्ण देशाचं लक्ष लागून राहिलेल्या राष्ट्रपतिपदाच्या निवडणुकीची मतमोजणी सुरू झाली असून रालोआचे उमेदवार रामनाथ कोविंद यांनी मतमोजणीच्या पहिल्या फेरीत आघाडी घेतली आहे. कोविंद यांना पहिल्या फेरीत २२१ मते मिळाली आहेत. त्यांच्या प्रतिस्पर्धी संयुक्त पुरोगामी आघाडीच्या उमेदवार मीरा कुमार १३४ मते मिळाली आहेत. आज सायंकाळी ५ वाजेपर्यंत देशाचा १४ वा राष्ट्रपती कोण, हे स्पष्ट होणार आहे.

आज सकाळी ११ वाजल्यापासून मतमोजणीला सुरुवात झाली. सुरुवातीला संसदेतील आणि त्यानंतर राज्यांच्या मतपेट्या इंग्रजी आद्याक्षरांच्या क्रमाने उघडल्या गेल्या. मतमोजणीच्या एकूण आठ फेऱ्यांपैकी पहिली फेरी पूर्ण झाली असून पहिल्या फेरीतच कोविंद यांनी ८७ मतांची आघाडी घेतली आहे. कोविंद यांना पहिल्या फेरीत २२१ मते मिळाली असून मीरा कुमार यांना १३४ मते मिळाली आहेत. पहिल्या फेरीतील कोविंद यांच्या आघाडीमुळे भाजप कार्यालयाबाहेर जल्लोष सुरू आहे.

राष्ट्रपतिपदाच्या निवडणुकीत रालोआचे उमेदवार म्हणून रामनाथ कोविंद आणि संपुआच्या उमेदवार म्हणून मीरा कुमार उभ्या आहेत. मात्र रालोआकडे बहूमताचा आकडा असल्याने कोविंद यांचीच निवड जवळपास निश्चित मानली जात आहे.