भर पावसात राष्ट्रपतींनी म्हटलं राष्ट्रगीत

मटा ऑनलाइन वृत्त । त्रिवेंद्रम

राष्ट्रगीताचा सन्मान कसा राखावा यासाठी राष्ट्रपती रामनाथ कोविंद यांनी समाजासमोर एक चांगलं उदाहरण घालून दिलं आहे. माता अमृतानंदमयी मठात रविवारी एका कार्यक्रमासाठी राष्ट्रपती रामनाथ कोविंद आले होते. यावेळी त्यांना लष्कराने सलामी दिली. सलामीवेळी राष्ट्रगीत सुरू असताना अचानक पाऊस सुरू झाला. परंतु राष्ट्रपतींनी छत्रीचा आधार न घेता भर पावसात राष्ट्रगीताला सलामी दिली.

देशाच्या सर्वोच्च पदी बसल्यानंतर रामनाथ कोविंद यांचा हा पहिलाच केरळ दौरा आहे. राष्ट्रगीत सुरू झाल्यानंतर एका अधिकाऱ्याने त्यांना छत्री देण्याचा प्रयत्न केला. परंतु त्यांनी ती घेण्यास नकार दिला व राष्ट्रगीत पूर्ण होईपर्यंत पावसातच उभं राहणं पसंत केलं. वल्लीक्कावुजवळील माता अमृतानंदमयी मठाने सुरू केलेल्या समाजोपयोगी कामांचे राष्ट्रपतींनी तोंडभरून कौतुक केले. विविध जाती-धर्मासाठी कार्य करण्यात केरळ खूप आधीपासून कार्यरत असल्याचे राष्ट्रपती म्हणाले.

अमृतानंदमयी मठाच्या पुढाकारातून ५ हजार गावांना पिण्याचे पाणी मिळणार आहे. माता अमृतानंदमयीकडून करण्यात येत असलेल्या कार्याचे राष्ट्रपतींनी कौतुक केले. राष्ट्रपती सध्या केरळ दौऱ्यावर असून त्यांचा कालचा हा पहिलाच दिवस होता.