पदाची शान वाढवण्याचा प्रयत्न करीन!: कोविंद

मटा ऑनलाइन वृत्त । नवी दिल्ली

'राष्ट्रपतीपद हे देशातील सर्वोच्च पद आहे. डॉ. राजेंद्र प्रसाद, डॉ. राधाकृष्णन, डॉ. अब्दुल कलाम यांच्यासारख्या महान व्यक्तींनी हे पद भूषवलं आहे. या पदाचा गौरव टिकवून ठेवण्याचा प्रयत्न करीन,' अशी ग्वाही राष्ट्रीय लोकशाही आघाडीचे (एनडीए) राष्ट्रपतीपदाचे उमेदवार रामनाथ कोविंद यांनी आज दिली.

राष्ट्रपतीपदाच्या निवडणुकीसाठी कोविंद यांनी पंतप्रधान मोदी यांच्या उपस्थितीत आज आपला उमेदवारी अर्ज भरला. अर्ज दाखल केल्यानंतर त्यांनी प्रथमच पत्रकारांशी संवाद साधला. राष्ट्रपती पदासाठी पाठिंबा देणाऱ्या सर्व पक्षांचे कोविंद यांनी आभार मानले. 'ज्या दिवशी मी बिहारचे राज्यपालपद स्वीकारले, तेव्हापासून माझा कोणत्याही राजकीय पक्षाशी संबंध उरला नाही. राष्ट्रपतीपद हे सुद्धा पक्षीय राजकारणाच्या पलीकडचं पद आहे. याची मला जाणीव आहे. ती कायम ठेवूनच मी काम करेन,' असं सांगून, 'सर्व पक्षांनी आपल्याला मतदान करावं,' असं आवाहन त्यांनी केलं.

'लवकरच आपला देश स्वातंत्र्याची ७५ पूर्ण करणार आहे. हा टप्पा ओलांडताना भारत निर्माणाचे स्वप्न पूर्ण करण्याचा माझा प्रयत्न राहील,' असं कोविंद यांनी सांगितलं. 'राष्ट्रपती हा देशाच्या तिन्ही सेना दलाचा प्रमुख असतो. त्या नात्यानं देशाच्या सीमा सुरक्षित राखण्याची जबाबदारीही त्यांची असते. ती योग्य तऱ्हेनं पार पाडण्याचा प्रयत्न करेन,' असंही कोविंद म्हणाले.