​२५ जुलै रोजी नवा राष्ट्रपती मिळेल: प्रणवदा​

मटा ऑनलाइन वृत्त । नवी दिल्ली

राष्ट्रपती प्रणव मुखर्जी यांनी आपण पुन्हा राष्ट्रपतीपदाच्या शर्यतीत नसल्याचे स्पष्ट संकेत आज दिले आहेत. माझा कार्यकाळ संपायला दोन महिने उरले आहेत आणि २५ जुलै रोजी नवे राष्ट्रपती पदभार स्वीकारतील, असे सूचक विधान प्रणव मुखर्जी यांनी केले.

माझ्यासोबत काम करणाऱ्या अनेक अधिकाऱ्यांना मी पुन्हा त्यांच्या पूर्वीच्या मंत्रालयांमध्ये आणि विभागांमध्ये पाठवायला सुरुवात केली आहे. दोन अधिकाऱ्यांना परराष्ट्र मंत्रालयात तर एका अधिकाऱ्याला वाणिज्य विभागात परत पाठवले आहे, असेही प्रणवदांनी नमूद केले.

राष्ट्रपतींचे माध्यम सचिव वेणू राजमणी यांची नेदरलॅण्ड्सचे राजदूत म्हणून नियुक्ती झाली आहे. त्यांना निरोप देण्यासाठी राष्ट्रपतींच्या सचिव ओमिता पॉल यांनी आयोजित केलेल्या समारंभाला राष्ट्रपती प्रणव मुखर्जी हजर होते. यावेळी बोलताना त्यांनी अत्यंत सूचक शब्दांत आपण पुन्हा राष्ट्रपतीपदासाठी इच्छूक नसल्याचे संकेत दिले.

दरम्यान, राष्ट्रपतीपदाबाबत पडद्यामागून सत्ताधारी पक्ष आणि विरोधी पक्षांच्या जोरदार हालचाली सुरू आहेत. प्रणव मुखर्जी यांना पुन्हा राष्ट्रपतीपदासाठी सरकारची पसंती असेल तर त्यावर विचार करायला आम्ही तयार आहोत, असे काँग्रेससह विरोधी पक्षांचे म्हणणे आहे. या पार्श्वभूमीवर प्रणव मुखर्जी यांच्या विधानाला विशेष महत्त्व आहे.