नोटाबंदी: पंतप्रधान खोटं बोलले, माफी मागा

मटा ऑनलाइन वृत्त । नवी दिल्ली

पंतप्रधान नरेंद्र मोदी यांनी वैयक्तिक निर्णय घेऊन नोटाबंदी केली. त्यामुळे काळा पैसा बँकेत आलाच नाही. उलट देशात आर्थिक अराजकता निर्माण झाली, अशी टीका करतानाच पंतप्रधानांनी १५ ऑगस्ट रोजी नोटाबंदीमुळे ३ लाख कोटी काळा पैसा बँकेत जमा झाल्याचा दावा केला. प्रत्यक्षात ९९ टक्के रक्कमच बँकेत जमा झाली आहे. पंतप्रधान खोटं बोलले. त्यांनी देशाची माफी मागावी, अशी जोरदार मागणी काँग्रेसने केली आहे.

नोटाबंदीनंतर एक हजाराच्या केवळ ९९ टक्के नोटाच बँकेत जमा झाल्याची पोलखोल रिझर्व्ह बँकेने केल्यानंतर काँग्रेस नेते आनंद शर्मा यांनी पत्रकार परिषद घेऊन पंतप्रधानांनी घेतलेल्या नोटाबंदीच्या निर्णयावर जोरदार टीका केली. शर्मा म्हणाले, कुठं गेले ४-५ लाख कोटी रूपये? प्रत्येक वेळी सरकार खोटं बोललं आहे. ग्रामीण बँकांतून पैसा घेतला नाही. शेतकऱ्यांवर अन्याय झाला. पंतप्रधानांनी आश्वासन पाळलं नाही. जनतेची फसवणूक केली.

देशात ९६ टक्के व्यवहार रोख स्वरूपात होतात. १५.२८ लाख कोटी नकली नोटा बँकेत जमा झाल्याचं सरकारचं म्हणणं आहे. पण रिझर्व्ह बँकेने केवळ ४१ कोटी रूपये बँकेत जमा झाल्याची आकडेवारी जारी केली आहे. याच साठी का भारतात आर्थिक अराजकता निर्माण केली गेली का? भारताचा विकास दरही घटला. हा पंतप्रधानांचा वैयक्तिक निर्णय होता, असं शर्मा म्हणाले.

नोटाबंदीमुळे जादा रक्कम येणार नाही. हे सरकारला माहीत होतं. म्हणून त्यांनी टेरर फंडिंगचे ४-५ लाख कोटी रूपये गोठले जातील असं सर्वोच्च न्यायालयात सांगितलं. आज त्यावर सरकारचं काय म्हणणं आहे? असा सवालही त्यांनी केला.