यूपीत प्रियांका गांधींच्या भूमिकेला काँग्रेसची कात्री

मटा ऑनलाइन वृत्त । लखनऊ

उत्तर प्रदेशात सत्ताधारी समाजवादी पक्षासोबत काँग्रेसची आघाडी घडवून आणण्यात मोलाची भूमिका बजावणाऱ्या प्रियांका गांधी प्रचारातही केंद्रस्थानी असणार का, याबाबतच्या तर्कवितर्कांना अखेर पूर्णविराम मिळाला आहे. यूपीच्या 'निवडणूकपटा'वरील प्रियांकांच्या भूमिकेला काँग्रेसनं कात्री लावली आहे. प्रियांका उत्तर प्रदेशात आघाडीचा प्रचार करणार असल्या तरी त्यांचा प्रचार फक्त रायबरेली आणि अमेठी या मतदारसंघांपुरताच मर्यादित असणार आहे.

सप-काँग्रेस आघाडी घडवून आणल्यानंतर प्रियांका गांधी जोमानं यूपीच्या निवडणूक प्रचारात उतरणार, असं बोललं जात होतं. काँग्रेसच्या स्टार प्रचारकांच्या यादीत त्यांना स्थान मिळाल्यानं या चर्चेला बळकटी मिळाली होती. यूपीचे मुख्यमंत्री अखिलेश यादव यांच्या पत्नी डिंपल यांच्यासोबत त्या प्रचारसभांना संबोधित करतील, असंही बोललं जात होतं. प्रियांकांच्या संभाव्य सक्रियतेमुळं कार्यकर्त्यांमध्येही उत्साहाचं वातावरण होतं. मात्र, त्या उत्साहावर विरजण पडलं आहे. पक्ष सूत्रांनी दिलेल्या माहितीनुसार, प्रियांका या अमेठी व रायबरेली या गांधी कुटुंबाच्या पारंपरिक मतदारसंघांतच प्रचार करणार आहेत.

प्रकृतीच्या कारणास्तव सार्वजनिक कार्यक्रमांपासून दूर असलेल्या काँग्रेस अध्यक्षा सोनिया गांधीही प्रचारात उतरणार आहेत. त्या देखील रायबरेली व अमेठी या जिल्ह्यांतील विधानसभा मतदारसंघांमध्येच प्रचार करतील. सोनिया गांधी २० फेब्रुवारीला येथे सभा घेणार आहेत, तर प्रियांका गांधी १३ ते १८ फेब्रुवारी दरम्यान प्रचाराची राळ उडवून देणार आहेत.