नाणेफेकीने प्राध्यापक नियुक्ती

वृत्तसंस्था, चंडीगढ

एकाच पदासाठी दोन पात्र उमेदवार. एकाचा अनुभव मोठा, तर दुसऱ्याचे गुण अधिक. वाद पोहोचला मंत्रिमहोदयांच्या दरबारी. मंत्र्यांनी शोधलेला तोडगा दोन्ही बाजूंनी मान्य केला. मग हवेत नाणे उडाले आणि एकाच्या नियुक्तीवर मोहर उमटली.

पंजाबचे तंत्रशिक्षणमंत्री चरणजीतसिंग चन्नी यांची ही नाणेफेक सोमवारी प्रसिद्धीमाध्यमांनी कॅमेऱ्यात टिपली आणि त्यावरून वाद उभा राहिला. पंजाबमधील विविध कॉलेजांतील मेकॅनिकल विषयासाठीच्या ३७ प्राध्यापकांची राज्य लोकसेवा आयोगामार्फत नियुक्ती झाली. पण पटियालातील सरकारी तंत्रशिक्षण केंद्रामध्ये प्राध्यापकपदाची एक जागा होती व त्यासाठी नाभा आणि पटियालातील दोन प्राध्यापकांनी पसंती दर्शवली होती. त्यावर तोडगा निघत नसल्याने प्रश्न मंत्रिदरबारी आला. एकाचा अनुभव मोठा होता, तर दुसऱ्याचे गुण अधिक होते. त्यामुळे चन्नी यांनी दोघांनाही बोलावून घेतले. आपसात तोडगा काढण्यास सांगण्यात आले. मात्र चन्नी यांनीच तोडगा काढावा, असा आग्रह धरण्यात आला. अखेर चन्नी यांनी नाणेफेक करून हा वाद मिटवला.