नितीशकुमार पंतप्रधानपदाचे दावेदार

मटा ऑनलाइन वृत्त । पटना

२०१९मध्ये होणाऱ्या लोकसभा निवडणुकीत पंतप्रधान नरेंद्र मोदी यांना टक्कर देण्यासाठी बिहारचे मुख्यमंत्री नितीशकुमार यांना पंतप्रधानपदाचे दावेदार म्हणून उभे करण्यात येणार आहे. नितीश यांच्या संयुक्त जनता दलानं (जेडीयू) त्या दृष्टीनं तयारी सुरू केली असून 'विकासपुरुष' म्हणून नितीशकुमार यांची प्रतिमा निर्मिती करण्याचा जेडीयूचा प्रयत्न आहे.

देशाच्या राजकारणात नरेंद्र मोदी यांना टक्कर देणारा एकही नेता नसल्याने मोदींना पर्याय म्हणून नितीशकुमार यांना 'प्रोजेक्ट' करण्याचं संयुक्त जनता दलाने ठरवलं आहे. मोदींना नितीशकुमार हेच एकमेव पर्याय होऊ शकतात. शिवाय नितीशकुमारांचा चेहरा सर्व स्तरातून स्वीकारला जाणारा आहे. त्यांच्या नेतृत्वाखाली सर्व धर्मनिरपेक्ष पक्षांनी एकत्र यावं, असं आवाहन जेडीयूनं केलं आहे. नितीशकुमार हे दूरदृष्टीचे आणि विकासाभिमुख नेते असल्याने देशातील जनता त्यांना पंतप्रधान म्हणून स्वीकारेल, असा विश्वास जेडीयूच्या प्रवक्त्या भारती मेहता यांनी व्यक्त केला.

'सब का साथ' विरुद्ध 'सात निश्चय'

मोदी यांनी निवडणुकीत 'सब का साथ, सब का विकास' ही घोषणा दिली आणि ती लोकप्रिय ठरली होती. त्याच धर्तीवर नितीशकुमार यांनी 'सात निश्चय' ही घोषणा देऊन बिहारमध्ये विकास घडवून आणला आहे. त्यामुळे मोदींच्या 'सब का साथ'ला 'सात निश्चय'नं उत्तर देता येईल,' असंही मेहता म्हणाल्या. 'सात निश्चय' योजनेद्वारे नितीशकुमारांनी प्रत्येक घरात मोफत वीज आणि पाणी दिले. शासकीय नोकऱ्यात महिलांना ३५ टक्के आरक्षण दिले. विद्यार्थ्यांनींना सायकल वाटप केले. या योजना बिहारमध्ये लोकप्रिय झाल्याने देश पातळीवरही त्या स्वीकारल्या जाऊ शकतात. 'सात निश्चय'चा तसा प्रचार-प्रसार करण्यात येणार असल्याचंही त्यांनी सांगितलं.