काश्मिरातील नियुक्तीसाठी प्रोत्साहन

सरकारकडून विशेष सवलती जाहीर

वृत्तसंस्था, नवी दिल्ली

केंद्र सरकारच्या कर्मचाऱ्यांना काश्मीर खोऱ्यात सेवा बजावण्यासाठी उत्तेजन देण्याच्या उद्देशाने सरकारकडून विशेष सवलती, प्रोत्साहनपर योजना जाहीर करण्यात आल्या आहेत. काश्मीर खोऱ्यात २०२०पर्यंत दोन वर्षे किंवा त्यापेक्षा अधिक काळ सेवा बजावणाऱ्या केंद्र सरकारी कर्मचाऱ्यांना निवास, सुरक्षा आणि कार्यालयापर्यंत वाहतुकीची व्यवस्था यासाठी संबंधित विभागाकडून व्यवस्था करण्यात येणार आहे. सरकारच्या कार्मिक मंत्रालयाने यासंदर्भातील आदेश मंगळवारी जारी केला.

काश्मीर खोऱ्यात अनंतनाग, बारामुल्ला, बडगाम, कुपवाडा, पुलवामा, श्रीनगर, कुलगाम, शोपियन, गंदरबाल आणि बांदीपोरा या दहा जिल्ह्यांचा समावेश होतो. या जिल्ह्यांमध्ये सेवा बजावण्यास प्रोत्साहन देण्याचा सरकारचा उद्देश आहे.

कर्मचाऱ्यांना कार्यालयापर्यंत येण्याजाण्यावर होणाऱ्या अतिरिक्त खर्चापोटी उपस्थितीच्या प्रत्येक दिवसासाठी ११३ रुपयांचा भत्ताही दिला जाणार आहे. जम्मू-काश्मिरात नियुक्त कर्मचाऱ्यांना दररोज ९७.८५ रुपयांचा 'मेसिंग अलावन्स'ही दिला जाणार आहे.

काश्मीर खोऱ्यातील ज्या पेन्शनरांना सरकारी बँका किंवा पे अँड अकाउंट्स ऑफिसर (पीएओ) कार्यालयातून पेन्शन घेणे शक्य नसेल, अशांसाठी सध्याचे नियम शिथील करण्यात आले आहेत. हे कर्मचारी काश्मीर खोऱ्याच्या बाहेर जिथे ते स्थायिक झाले असतील, तिथे त्यांना पेन्शन मिळण्याची व्यवस्था केली जाणार आहे.

कुटुंबासाठी पसंतीच्या ठिकाणी व्यवस्था

या विशेष सवलतींमध्ये आपल्या कुटुंबीयांना सरकारच्या खर्चाने देशातील आपल्या पसंतीच्या कोणत्याही स्थळी ठेवण्याचा पर्यायही कर्मचाऱ्यांना मिळणार आहे.