'BHUतील आंदोलन नक्षलवादी आंदोलनासारखं'

मटा ऑनलाइन वृत्त । नवी दिल्ली

बनारस हिंदू विद्यापीठात मुलीची छेड काढल्याच्या निषेधार्थ सुरू असलेल्या विद्यार्थी आंदोलनाची भाजप नेते सुब्रमण्यम स्वामी यांनी नक्षलवादी आंदोलनाशी तुलना केली आहे. विद्यापीठात सुरू असलेलं विद्यार्थ्यांचं आंदोलन नक्षलवादी आंदोलनासारखंच आहे, असं सुब्रमण्यम स्वामी यांनी म्हटलं आहे.

एका वृत्तसंस्थेशी बोलताना सुब्रमण्यम स्वामी यांनी हे वक्तव्य केलं. या प्रकरणात विद्यापीठाच्या कुलगुरूंनी चांगलं पाऊल उचललं. मी त्यांच समर्थनच करतो. कारण हे आंदोलन नक्षलवादी आंदोलनासारखं दिसतय. आंदोलनकर्त्यांना विद्यापीठात घुसायचे होते आणि तिथे त्यांना हिंसा घडवून आणायची होती, असा दावाही स्वामी यांनी केला. मुख्यमंत्री योगी आदित्यनाथ यांनी याप्रकरणी विस्तृत अहवाल मागवून चांगलंच केल्याचंही त्यांनी स्पष्ट केलं.

छेडछाड झाल्याचं त्या मुलीनं सांगितलं. पण छेड कुणी केली हे तिला माहित नाही. इतर विद्यार्थ्यांना छेड काढणारे कसे कळले? हे कळत नाही. आणि त्या मुलीने तात्काळ या प्रकाराची तक्रार दाखल केली होती का? असा सवालही त्यांनी केला. दरम्यान, बनार हिंदू विद्यापीठात आजही विद्यार्थ्यांचं आंदोलन सुरू आहे. शनिवारी या आंदोलनाचा भडका उडाला असता पोलिसांना त्यावर लाठीमार करावा लागला होता.