पंजाबः मुलींना पीएचडीपर्यंतचं शिक्षण मोफत

मटा ऑनलाइन वृत्त । चंदीगड

'मुलगी शिकली, प्रगती झाली' आणि 'मुलीच्या शिक्षणाने समाज सुधारतो', यासाठी पंजाब सरकारने योग्य पाऊल उचलले आहे. पंजाब विधानसभेत कॅप्टन अमरिंदर सिंह सरकारने पहिलेच बजेट सादर केले असून यात मुलींना नर्सरी ते पीएचडीपर्यंतचे शिक्षण मोफत करण्याची घोषणा केली आहे.

अर्थमंत्री मनप्रीत बादल यांनी २०१७-१८ चे बजेट आज विधानसभेत सादर केले. पंजाबमधील मुलींना नर्सरी ते पीएचडीपर्यंतचे शिक्षण मोफत केले जाणार असल्याची घोषणा त्यांनी यावेळी केली. अर्थमंत्र्यांनी विधानसेभेत आज १०५८०.९९ कोटींचा अर्थसंकल्प सादर केला. गेल्यावर्षीचा अर्थसंकल्प ६३८३.०१ कोटींचा होता. कॅप्टन अमरिंदर सिंह सरकारचा हा पहिलाच अर्थसंकल्प आहे. शेतकऱ्यांना दिलासा देण्यासाठी शेतकऱ्यांच्या कर्जमाफीसाठी १५०० कोटी रुपये मंजूर करण्यात आले आहेत. तसेच तरुणांना मोबाईल फ्री देण्यासाठी १० कोटी रुपये मंजूर करण्यात आले आहेत, अशी माहिती अर्थमंत्र्यांनी विधानसभेत दिली. दलित शेतकऱ्यांचे ५० हजार रुपयांपर्यंतचे कर्ज माफ केले जाणार असल्याचेही त्यांनी यावेळी सांगितले.

अर्थसंकल्पाती ठळक मुद्दे

> शेतकऱ्यांच्या कर्जमाफीसाठी १५०० कोटी रुपये
> नर्सरी ते पीएचडीपर्यंत मुलींना शिक्षण मोफत
> तरुणांना मोफत स्मार्ट फोनसाठी १० कोटी
> प्राथमिक शाळेत मुलांना मोफत पुस्तके
> मलेरकोटलाच्या उर्दू अकादमीसाठी १० कोटी
> दलितांचे ५० हजारांपर्यंतचे कर्ज माफ
> दरवर्षी १ लाख नोकरी देण्याचे आश्वासन
> लुधियाना आणि संगरूरमध्ये इंडस्ट्रियल पार्क